Thirrësi islam jeton
dhe vdes në rrugën e Amanetit...
01 mars 2016
"Mos pyet njeri për
gradën e besimit të tij, pyet veten
tënde për korrektësinë që ke në faljen e
namazeve, për shtimin e dhikrit, për
shoqërimin tënd me Kur'anin, për
ruajtjen e gjuhës dhe pastërtinë e
zemrës".
Këto fjalë ka postuar në profilin e tij
në twitter, thirrësi i shquar islam
saudit Dr. Aid El-Karni, pas përfundimit
të një ligjërate para dhjetra mijëra
muslimanëve në një prej qyteteve të
Filipineve, ku ndodhet për shërbim.
Tamam dy orë para një ngjarjeje të
padëshiruar...
Duke hipur në makinë, iu bë një atentat,
prej të cilit thuhet se ka shpëtuar, me
disa lëndime të lehta, falë mirësisë së
All-llahut.
Ajo që më frymëzon ky moment, teksa
lutem me zemër që zotëria i nderuar të
jetë mirë dhe të vazhdojë të përhapë
Dritën e Thirrjes së Shenjtë Islame,
kudo në botë, është fakti se thirrësi
islam, si kredo botërore, jeton dhe vdes
në rrugën e Amanetit që bart me vete në
shpirtin e tij. Thirrësi islam është
fenomen bekimesh hyjnore mbi gjithësinë!
Thirrësi islam është një shërbyes i
dorëzuar, që i do të mirën njerëzisë,
edhe armiqve të tij, të cilët i fton, u
hap horizonte, lutet për ta, u dëshiron
udhëzimin... Sepse thirrësi islam, i do
krijesat për Krijuesin e tyre, drejt Tij
i merr për dore në modestinë e zemrës së
tij...
Thirrësi islam nuk thyhet, nuk trembet,
nuk dorëzohet, para askujt dhe asgjëje!
Thirrësi islam është vijimësi e
shekujve, është Frymë që përhapet pa
pasur nevojë për lejen e dikujt. Nuk
vdes me vdekjen e ndonjërit,
përkundrazi, rritet e zhvillohet,
përhapet e pasurohet, dritëson e
dritësohet.., deri në cakun e fundit të
kësaj bote dhe jetës mbi Tokë!
Thirrësi islam është vazhdimësi e
mirësisë dhe mëshirës, me të cilat u
dërgua më i madhi i thirrësve, Hz.
Muhammedi (a.s), i cili teksa zgjidhte
ndëshkimin a faljen e popullit të tij,
para duarve të melekëve të dërguar në
mbështetje të tij, thoshte:
"All-llahumme fale popullin tim, se nuk
dijnë!".., dhe lutej për ta në
madhështinë e shpirtit të tij bujar e
falës...
All-llahumme na bëj të jetojmë për Ty
dhe të largohemi nga kjo botë si thirrës
drejt Fesë Tënde; Islamit! Amin!
Imam
Muhamed B. Sytari
Shkodër, më 1 mars 2016
 |
