Ditën e xhuma, më 20 shtator 2013, Myftinia Shkodër ka organizuar një aktivitet përkujtimor, në nostalgji të muajit Ramazan 1434/2013.
 
Në përshëndetjen e rastit, Myftiu i Shkodrës Imam Muhamed Sytari ka bërë disa falënderime në drejtim të Komunitetit Mysliman të Shqipërisë, bashkëpunëtorëve të tij të afërt, stafit të Myftinisë, Bashkisë Shkodër, mediave lokale, të rinjve të shumtë që iu bashkuan karvanit të teravisë 2013, imamëve, xhemateve dhe krejt atyre që kontribuuan që muaji i Ramazanit 1434/2013, të ishte një dëshmi i madhe besimi në Shkodër.
 
Aktiviteti është përshëndetur edhe nga Myftiu i Malësisë së Madhe, H. Edmir Smajlaj, që ka vlerësuar aktivitetin e Myftinisë së Zonës Shkodër gjatë muajit Ramazan, sikurse është lutur që atmosfera e mrekullueshme e besimit, e dëshmuar në ditët e muajit Ramazan, të vazhdojë edhe përtej tij, në Shkodër e në mbarë Shqipërinë.
 
Të pranishmit, kanë ndjekur një insert, ku është prezantuar aktiviteti i gjerë dhe i shumëllojshëm i Myftinië Shkodër gjatë Ramazanit që sapo kaloi.
 
Më pas, teologu Arben Halluni ka bërë një prezantim të detajuar të zhvillimeve kryesore që kanë mbushur ditët e Ramazanit me bukurinë e aktiviteteve, tubimeve fetare, emisioneve televizive, ndihmave të shpërndara për qindra familje shkodrane në nevojë etj. Ai ka theksuar se Myftinia Shkodër vazhdon të rrugëtojë në gjurmët e muajit Ramazan, duke kontribuar në rritjen e cilësisë së aktivitetit fetar në Shkodër dhe përtej tij.
 
Vëllai i nderuar Ervin Metani, ka përcjellë me shumë elokuencë, emocionet e përjetuara gjatë aktivitetit të përvitshëm të Hatmes Sherife, që Myftinia Shkodër organizoi këtë vit në xhaminë e Parrucës. Ai ka dëshmuar atmosferën e bukur që krijohet në Shkodër gjatë Ramazanit, si një dëshmi besimi dhe gjallërie islame.
 
Në fund të aktivitetit, për të pranishmit është shpërndarë edhe numri i ri i gazetës “Udha Islame”, përmbledhëse e aktivitetit të muajit Ramazan. Ndërkohë, të pranishmit kanë vijuar të bashkëbisedojnë dhe të ndajnë emocionet e muajit Ramazan, në një ftesë për kafe dhe çaj, organizuar me këtë rast.