Ditën e xhuma, më 17 maj 2013, ka mbërritur në Shkodër për një vizitë njëditore, Kryetari i Dijanetit të Republikës së Turqisë, prof. dr. Mehmet Gormez, i shoqëruar edhe nga një grup myftilerësh dhe hafizësh të shquar nga Turqia, Qiproja, Greqia etj.
           
Në pritje të Hirësisë së Tij, ka qenë Myftiu i Shkodrës Imam Muhamed Sytari, i cili i ka uruar mirëseardhjen në Shkodër.
           
Fillimisht, Kryetari i Dijanetit të Turqisë ka mbajtur një fjalë përshëndetëse dhe një këshillë vëllazërore para xhematit të xhamisë së Parrucës, pak para kohës së namazit të xhumasë.

Në fjalën e tij, ai ka shprehur kënaqësinë e tij për praninë në Shkodër, qytetin me tradita të lashta islame dhe me një shpirt të madh të bujarisë dhe vlerave islame. Ai ka vlerësuar se Shkodra ka një shpirt të veçantë besimi, që ndjehet nga kontakti i parë me të. Ai është lutur që Shkodra të ketë përherë begati dhe mirësi nga Zoti.
           
Më pas, takimi ka vijuar në zyrën e Myftiut të Shkodrës. Me këtë rast, Imam Muhamed Sytari ka shprehur gëzimin e tij për këtë vizitë historike të personalitetit më të shquar dhe drejtuesit më të lartë të Dijanetit të Turqisë. Myftiu e ka falënderuar prof. dr. Mehmet Gormez dhe ka vlerësuar interesimin e tij për Shkodrën dhe jetën islame në të. Myftiu e ka njohur Kryetarin e Dijanetit me disa nga problematikat dhe shqetësimet e Myftinisë Shkodër dhe nevojat e saj për zhvillimin e mëtejshëm të Thirrjes Islame.
           
Nga ana e tij, Kryetari i Dijanetit të Turqisë, ka garantuar Myftiun e Shkodrës se do të marrë përsipër ndërtimin e selisë së re të Myftinisë Shkodër, sikurse ka shprehur gatishmërinë për bashkëpunim të mëtejshëm për projekte të tjera në shërbim të kërkesave dhe nevojave që ka Myftinia Shkodër.
           
Në vazhdën e kësaj vizite, Kryetari i Dijanetit të Turqisë ka vizituar edhe Medresenë “Haxhi Sheh Shamia”, me dy degët e saj, kolegjin “Hasan Riza Pasha”, memorialin në nder të “mbrojtësit të Shkodrës”, Qendrën Kulturore “Junus Emre”, xhaminë “Ebu Bekër”, si dhe ka zhvilluar një takim në zyrën e Kryetarit të Bashkisë Shkodër, z. Lorenc Luka.           

Kjo vizitë vjen në kuadër të zhvillimit të Konferencës së 6-të të Kryetarëve të Bashkësive Islame të Ballkanit.