Myftinia Shkodër

Ditën e xhuma, më 29 janar 2016, Myftiu i Shkodrës, Imam Muhamed B. Sytari, zhvilloi një vizitë në shtëpinë e familjes Shkambi, në Drisht, për të ngushëlluar familjarët e dy vëllezërve, Abdullah e Skënder Shkambi, që u vranë para disa ditësh nga një bashkëfshatar i tyre.

Qëllimi i kësaj vizite ishte edhe shprehja e mirënjohjes së Myftinisë Shkodër për krejt fisin Shkambi dhe burrat e tij të urtë, që vendosen lirimin e familjarëve të vrasësit nga gjakmarrja.

Myftiu tha se përtej dhimbjes, shembulli i kësaj familjeje dhe fisi të nderuar në Drisht, e tejkalon këtë moment sprove dhe kthehet në një vlerë humanizmi, besimi dhe qytetarie të lartë.

Edhe në hytben e tij të xhumasë, Imam Muhamed B. Sytari, vlerësoi shembullin e këtij fisi dhe u lut për paqtimin e njerëzve dhe kthimin e tyre nga besimi dhe Islami.

"Mirësia e madhe dhe bujaria e shpirtit, e dëshmuar botërisht nga fisi Shkambi, në fshatin tuaj, me rastin e fatkeqësisë së papritur që goditi familjet e tyre, u bë shkak obligues për mua që të jem sot në Drisht, duke u lutur e falur bashkarisht në këtë ditë të begatë të xhumasë.

Lajmi i bërë publik, që burrat e këtij fisi me emër, liruan nga gjakmarrja familjarët dhe fisin e personit që preku në shpirtin e tyre, jo vetëm që më mbushi me emocion të madh besimi dhe shprese, por u kthye në një detyrim moral, besimor e qytetar, për të ardhur sot në xhaminë tuaj dhe nga ky minber i të dërguarit të All-llahut, botërisht t’u them: All-llahu jua zbardhtë faqen në këtë botë dhe në ahiret, o burra të urtë e besimtarë të fisit Shkambi!
Drishti dhe Postriba, janë një kala e fortë e besimit dhe e Islamit, ku njerëzit e mirë të kësaj toke, historikisht kanë dëshmuar vlera të larta të besimit, harmonisë, paqes, punës së ndershme, fitimit të hallallit, nderit të grave e burrnisë tipike të burrave të urtë e largpamës të kësaj zone!

Ne si muslimanë, e kemi për detyrë dhe obligim fetar të jemi përherë afër njëri-tjetrit, në gëzime e në hidhërime, në dëshpërime e në sihariqe, me të cilat sprovohet jeta e jonë.

Sot, më shumë se kurrë, ne si muslimanë, si shqiptarë, si vëllezër të një besimi, një gjaku e një gjuhe, e kemi për detyrë të mbjellim farën e bekuar të pastrimit të zemrave nga inatet, smira, urrejtja e pusitë kundër njëri-tjetrit! E kemi për obligim fetar e kombëtar ta ruajmë të paprekur shenjtërinë e jetës, familjes, farefisit, atë të komshiut të mirë e mikut-vëlla, për të cilët na porosit Kur’ani dhe Hz. Muhammedi (a.s) në ajete dhe hadithe të shumta!" - tha Myftiu.

 

---