Myftinia Shkodër

Paraditën e së martës, më 26 janar 2016, H. Skender Bruçaj, Kryetar i Komunitetit Mysliman të Shqipërisë, zhvilloi një vizitë pune në Shkodër, ku kishte programuar vizitën e Medresesë "Haxhi Sheh Shamia" dhe një bashkëbisedim me maturantët e të dyja degëve.
I shoqëruar nga antarët e Kryesisë së KMSh, Dr. Genti Kruja, z. Astrit Zharri, si dhe Myftiu i Shkodrës, Imam Muhamed B. Sytari, Kryetari i KMSh u prit nga z. Kujtim Dervishi, drejtor i Medresesë "Haxhi Sheh Shamia", z. Ridvan Seferaj, kryetar i Shoqatës "Istanbul" dhe stafet e dy degëve të medresesë.

Fillimisht, Kryetari Bruçaj, zhvilloi një vizitë në objektin e ri të Medresesë, ku zhvillojnë mësim klasat e ciklit të ulët. Në vizitat e tij në disa prej klasave, Kryetari i KMSh, dha mesazhe të përzemërta për suksesin dhe mbarësinë e mësuesve në edukimin e brezit të ri me frymën e dashurisë për dijen dhe shkollën.

Më pas, vizita vijoi me bashkëbisedimin e organizuar nga drejtoria e shkollës, ku Kryetari i KMSh dha mesazhet dhe këshillat e tij për 150 maturantët e medresesë së Shkodrës; për vazhdimin e studimeve dhe nxitjen për të perfeksionuar dituritë, në fushat e përzgjedhura për studime.

Kryetari Bruçaj tha se kushtet bashkëkohore që ofron Medreseja e Shkodrës dhe ato të krejt vendit, janë një mirësi e madhe dhe një shtysë më shumë për ta vlerësuar këtë begati të Zotit, me studim të vazhdueshëm dhe reflektimin e moralit të shkollës në realitetet e përditshme.

Kryetari i KMSh, rrëfeu edhe një pjesë të eksperiencës së tij personale, si ish-medresist dhe rëndësinë e madhe që ka mësimi dhe studimi në jetë.
Më pas, maturantët i drejtuan Kryetarit Bruçaj disa pyetje që lidhen edhe me të ardhmen e studimeve të tyre, pas përfundimit të Medresesë.

Më herët, maturantët i përshëndeti edhe Myftiu i Shkodrës, Imam Muhamed B. Sytari, si dhe drejtori i Medresesë, z. Kujtim Dervishi.

Me rastin e kësaj vizite dhe takimi të përzemërt, H. Skender Bruçaj i dhuroi dy bibliotekave të Medresesë "Haxhi Sheh Shamia", kolanën e plotë prej dhjetë vëllimesh të revistës "Zani i Naltë".

 

---