Sa më shumë tribuna e tubime
që nxisin dashninë e Ma të Dashtunit (a.s)..!
20 dhjetor 2015
Krahasimi pervers i
aktiviteteve të larmishme e dobiprurëse
të Mevludit Sherifë, me shpërndarjen e
harameve si sadeka, është pa dyshim
karikatura më e sofistikuar e botës së
fanatizmit të ngurtë sektar, që ka mbi
një shekull që nuk bën gjë tjetër vetëm
se përhapjen e smogut dhe leximit të
paekuilibruar të teksteve fetare,
përçarjes dhe gangrenizimit të vlerave
reale të harmonisë dhe Vëllazërisë së
shenjtë islame!
I respektojmë fetvatë e kujtdo prej
dijetarëve tanë të shquar, duke u
përpjekur t’i lexojmë në hapësirat e
konteksteve kohore dhe rrethanore!
“Divergjencat e dijetarëve janë mëshirë,
sepse i hapin ymmetit disa dyer në
praktikimin e kollajtë të fesë në jetën
e tyre”[1], thonë
të mëdhenjtë tanë! Nuk i hyjnizojmë as
ata, as fetvatë e tyre.
Hoxha i jonë, H. Vehbi S. Gavoçi, në një
prej derseve private në akide, në lidhje
me një prej temave, thoshte: "Mendimet e
filan Shejkhul-Islami në këtë temë, e
nxjerrin feje (mukeffire) atë! Por, ne
nuk themi se ai ka dalë feje! Inshallah,
në xhennet e pyesim se ça ka dashtë me
thanë me atë gja!" Poashtu na thoshte
se: "Filan hoxhë, me fetvatë e tij
autodidakte, ka ndikuar shumë në
përçarjen e shqiptarëve në Sham
(Damask), sidomos në çështjen e
Mevludit. Inshallah e bashkon All-llahu,
atë dhe ne, me hanefijtë e mirë në
xhennet!"
Pra, edhe në tematika thelbësore, jemi
edukuar të mbajmë gojën! Ta
mirëkuptojmë, ta justifikojmë a edhe ta
kundërshtojmë tjetrin me argumente, por,
pa tejkaluar kufirin e dashamirësisë dhe
etikës së komunikimit islam!
Tejkalimi i kufirit të etikës dhe
komunikimit me Resulull-llahun (a.s),
nëpërmjet talljes e sarkazmës me format
e përkujtimit të Lindjes, dërgesës,
misionit e traditave të tij, të
përhapura ndër shekuj tek muslimanët,
nuk i shërben asgjëje! As vëllazërisë
islame, as dijes në vetvete, as
zhvillimit të ekuilibruar të Thirrjes
Islame në trojet tona, as edukimit të
brezit të ri!
Kushdo që e ka bërë këtë krahasim, ka
gabuar dhe ka tejkaluar kufijtë e
komunikimit fetar, intelektual e mbi të
gjitha atë të elitave! Zoti e faltë!
E, përsa i përket temës së Mevludit
Sherifë, kam folur në hytben e kësaj
xhumaje, mund ta lexojë kushdo të
publikuar në portalin e mirënjohur
/www.islampress.info/ në linkun e
mëposhtëm:
http://islampress.info/2015/12/18/pasha-jeten-tende-o-muhammed/.
Ka edhe mendime ndryshe në lidhje me
temën. Absolutisht, i respektoj dhe i
nderoj, pa tejkaluar kufijtë e etikës
islame ndaj kujtdo që ka një mendim
tjetër!
E, mbi të gjitha, ejani të gjithë së
bashku ta madhërojmë Zotin tonë për
mirësinë e madhe dhe mëshirën e Tij ndaj
botës, Lindjen e Begatë të Hz.
Muhammedit (a.s), pastrimin e gjoksit të
tij që në vegjëli, edukimin e tij,
ruajtjen e tij gjatë 40 viteve të para
të jetës, dërgesën profetike në moshën
40 vjeçare, si Vulë e krejt të
dërguarve, si plotësues i misioneve të
mëparshme dhe vulosës i tyre me
plotësimin e Kur'anit Famëlartë!
Ejani, ta përhapim kudo këtë lajm të
madhnueshëm dhe të ftojmë botën të
besojë në Hz. Muhammedin (a.s) dhe fenë
e tij, fenë e krejt të dërguarve të
Zotit të vetëm të botrave!
Tema e “Mevludit Sherifë”, është simbol
uniteti e harmonie në mesin e
muslimanëve! Jo sarkazmës e ironisë së
panevojshme me simbolet shekullore të
ymmetit!
Për fund, mendoj se e mira, për shumë
teologë e imamë të nderuar të botës tonë
shqiptare, por jo vetëm, sidomos në këtë
periudhë të Mevludit Sherifë, (por edhe
para e pas tij, që të mos ngelemi
fanatikë datash e muajsh në tubimet tona
për ma të Dashtunin tonë), do të ishte,
të mos bëjnë deklarata e fetva të
pakuptimta dhe kontradiktore, por të
bashkëpunojmë së bashku në rrugën e
nxitjes së dashnisë për Resulull-llahun
(a.s) dhe respektin në mes vete!
Tubimet për të kujtuar Resulull-llahun
(a.s), me këndim të pjesëve të
“Mevludit”, a pa to, me ligjërata, a pa
to, me simpoziume e tribuna fetare, a pa
to, me koncerte të bukura me ilahi, a pa
to, me botime speciale, a pa to etj,
janë pa dyshim një përpjekje e
lavdëruar në rrugën e lartësimit të
Emrit, Mesazhit dhe Modelit të Zotërisë
tone, për të cilin kanë nevojë shoqëritë
e sotme njerëzore!
Imam Muhamed B.
Sytari
Myfti i Zonës Shkodër
20 dhjetor 2015
[1] Mexhd Mekki,
“Fetava Mustafa Zerka”, botimi i dytë,
Damask, 2004, f. 216.
 |
