Myftinia Shkodër

Pas kronikës së një dite më parë në Tv Antena Nord në lidhje me rastin e familjes Kuçaj në fshatin Shtoj i Vjetër, paraditën e së enjtes, më 3 dhjetor 2015, Myftinia Shkodër ka dhënë një mesazh solidarizimi me rastin në fjalë.

Vetë Myftiu i Shkodrës, Imam Muhamed B. Sytari, me bashkëpunëtorë të tij, ka zhvilluar një vizitë në këtë familje në skamje, ku ka parë nga afër gjendjen e mjerueshme të saj.

Myftiu ka dhënë një mesazh mediatik, ku ka shprehur solidarizimin e Myftinisë Shkodër me këtë familje, si dhe ka ftuar institucionet shtetërore, bizneset dhe shoqatat e ndryshme bamirëse të japin ndihmën dhe kontributin e tyre për t'i ardhur në ndihmë kësaj familjeje me probleme të shumta ekonomike e shëndetësore.

Myftiu ka garantuar se Myftinia Shkodër do të ndihmojë konkretisht në përkrahjen e kësaj familjeje, sikurse e ka falënderuar median për bërjen evident të këtij rasti.

Myftinia Shkodër fton institucionet vendore dhe bizneset e ndryshme të kontribuojnë për familjet në nevojë, sepse solidarizimi me njerëzit në skamje sjell bekim e mbarësi nga Zoti!

 

---