Myftinia Shkodër

Është kënaqësi dhe nder t’ju përshëndes sonte në këtë mbrëmje të shënuar për bashkësinë e muslimanëve të Shkodrës e të mbarë Shqipërisë, teksa përkujtojmë sëbashku një datë të shënuar e të paharruar për historinë tonë kombëtare.
 
Si sot 25 vite më parë, më16 nëntor 1990, bri kalasë së Shkodrës, në lagjen Tabakë, mbarë bota u bë dëshmitare e fillimit të një epoke të re, jo vetëm për Shkodrën e dijes dhe dijetarëve, por për mbarë Shqipërinë e burrit të urtë e qëndrestar, Hafiz Sabri Koçi, që lartësonte drejt qiejve dëshmitarë, thirrjet e harmonisë islame dhe asaj kombëtare në ditën më të lumtur të jetës së tij, në nëntorin më të bekuar e krejt shekullit, për Shqipërinë e shqiptarët!
 
Si sot e 25 vite më parë, Hoxha i urtë, përballë një turme të stërmadhe shqiptarësh, besimtarë në Zotin dhe në vlerat e vëllazërisë kombëtare, përkufizoi të shkuarën, të sotmen e tij të atëherëshme dhe të ardhmen tonë, duke përcjellur mesazhet e vëllazërisë dhe harmonisë kombëtare, domosdoshmërinë e lirisë së besimit dhe nxitjen për punë dhe sakrifica, për një të ardhme më të mirë se e sotmja, pas 25 vitesh nga ajo ditë!
 
Përkujtimi i kësaj date, bart në vetvete mesazhet e qarta të lirisë së besimit, të cilin duhet ta ruajmë të paprekur e të papërlyer, sidomos në këto kohë trazirash botërore, kur dikush guxon ta përlyejë atë me llumine afetarizmit, islamofobisë dhe pabesisë ndaj njerëzimit mbarë!
 
Dhuna dhe terrori, ekstremizmi dhe abuzimet e pështira të grupeve a individëve të sëmurë, që kanë trazuar dhe lënduar pa masë humanizmin sot, nuk duhet të ndikojnë assesi tek ne fetarët, as tek intelektualët e masat e gjera, për t’u hutuar deri në atë pikë sa të akuzojmë një fé a një tjetër për atë që vetë feja nuk e ka pasur, as mund ta ketë kurrë si njollë të zezë në boshtin dhe thirrjen e saj hyjnore!
 
Në këtë ditë botërore të tolerancës dhe në këtë atmosferë të begatë të respektimit të lirisë së besimit, ne si muslimanë, nuk ka sesi të mos përsërisim thirrjet e Kur’anit dhe ato të më të dashurit të zemrave tona, Hz. Muhammedit (a.s), për t’u afruar përherë e më shumë me Zotin, besimin, Librat e Shenjtë, vlerat universale të përcjella ndër shekuj nga të dërguarit e Tij, si dhe të punojmë pa u ndalur për rritjen dhe forcimin e urave të komunikimit dhe të bashkëpunimit ndërnjerëzor, sepse njeriu është vëlla i njeriut, ndërsa besimtarët, një familje e begatë!
 
Këto vitet e fundit, janë vrarë padrejtësisht me qindra mijëra njerëz të pafajshëm, në mbarë botën. Kanceri i islamofobisë dhe i nxitjes së urretjes ndërfetare na kërcënon të gjithëve sot, që do të thotë se krejt ne jemi të ftuar për të bërë si duhet punën tonë si besimtarë e qytetarë elitarë të këtij vendi, këtij kontinenti e botës së përbashkët!
 
Sot, në këtë ditë reflektimi e besëlidhjeje, të  gjithë ne i themi BOLL terrorizmit, bollvrasjeve e luftrave të pakuptimta në botë, boll shkëndijave të urrejtjes ndërfetare, boll afetarizmit ahmak, boll nxitjes së intolerancës në mesin e njerëzve me besime e mendime të ndryshme, boll korrupsionit, boll mashtrimit të masave, boll daljes kundra vullnetit të Zotit, që njeriu të jetojë në paqe me vëllanë e tij njeri: “O ju njerëz, Ne ju krijuam juve prej një mashkulli dhe një femre, ju bëmë popuj dhe fise që të njiheni në mes vete e, s’ka dyshim se tek All-llahu, më fisniku ndër ju është më i përkushtuari ndër ju!”[1]
 
All-llahu e begatoftë Shkodrën, Shqipërinë, shqiptarët, mbarë njerëzimin!
 
Në nderim të viktimave të panumërta të dhunës dhe terrorizmit në këto vite, në mbarë botën, ju ftoj të ngrihemi në këmbë e të këndojmë së bashku një Fatiha për shpirtrat e tyre!
 
Faleminderit!

Imam Muhamed B. Sytari
Myfti i Zonës Shkodër
 
(Fjala e rastit në aktivitetin e 25 vjetorit të rilejimit të fesë,
në teatrin “Migjeni”, më 16 nëntor 2015)
 

[1]Kur’ani, El-Huxhurat: 13.

 

---