Myftinia Shkodër

Në kuadër të përkujtimit të 25 vjetorit të rihapjes së xhamisë së Plumbit, që sinjalizoi edhe rilejimin me ligj të praktikës dhe lirisë fetare në vendin tonë, Myftinia Shkodër, vazhdon përgatitjet për ta kthyer këtë datë në një festë të rëndësishme dhe ditë të shënuar, mbi krejt datat dhe ditët.

Paraditën e sotme, Myftiu i Shkodrës, Imam Muhamed B. Sytari, ishte në terren, për të ndjekur dhe orientuar përgatitjet për këtë ngjarje të shënuar, më e rëndësishmja për muslimanët e Shqipërisë, në 25 vjetorin e ceremonisë madhështore, që mblodhi dhjetra mijëra muslimanë shkodranë, në një ditë dëshmie.

Vlen të përmendet se viti 2015, është shpallur nga Myftinia Shkodër, si vit jubilar, sikurse është dhënë udhëzim për krejt imamët dhe xhamitë e Shkodrës, që të jenë në lartësinë e kësaj ngjarje dhe reflektimin e saj në aktivitetet e shumta, që janë zhvilluar këtë vit dhe ato që do pasojnë.

Myftinia Shkodër, fton të gjithë qytetarët e saj që të bashkëpunojnë dhe të ofrojnë ndihmën dhe përkrahjen e tyre, në shërbim të përkujtimit sa më madhështor të kësaj ngjarjeje dhe përhapjen me urtësi të vlerave islame në Shkodër dhe përtej saj.

 

---