Myftinia Shkodër

Në orët e para të ditës së shtunë, më 3 tetor 2015, ka mbërritur edhe grupi i dytë i haxhilerëve të Komunitetit Mysliman të Shqipërisë, në mesin e të cilëve edhe haxhilerët e Shkodrës.

Në pritje të tyre, në aeroportin e Rinasit, kishte dalë edhe Myftiu, Imam Muhamed B. Sytari, i cili u takua me të gjithë haxhilerët, duke i uruar haxh të pranuar dhe adhurime të shumëfishuara.

Myftiu u interesua për shëndetin e haxhilerëve dhe u lut që kjo eksperiencë besimi të ketë shërbyer për secilin, si një besëlidhje e re me Zotin dhe një hap i ri në jetë, në rrugëtimet e reja të besimit dhe kërkimit të pëlqimit të Zotit në jetën e përditshme.

Myftiu uroi edhe imamët e pranishëm në këtë udhëtim jete, që ishin mbushur me emocione të mëdha dhe shprehnin falënderime ndaj Zotit për këtë mirësi të madhe dhe mundësinë e reaizimit të këtij adhurimi të mrekullueshëm.

Pak momente para ezanit të sabahut, haxhilerët e Shkodrës mbërritën para xhamisë së Parrucës, në pritje të cilëve kishin dalë familjarë e dashamirë, të përmalluar e plot gëzim për kthimin e tyre shëndosh e mirë, pranë familjeve e miqve të tyre.

Me këtë rast, Myftinia Shkodër uron Haxh të pranuar për krejt haxhilerët e Shqipërisë, veçanërisht atyre të Shkodrës dhe Malësisë së Madhe.

 

---