Myftinia Shkodër

Me ftesë të Qendrës Studimore “Bilim ve Sanat Vakfı”, Stamboll, Myftiu i Shkodrës, Imam Muhamed Sytari, mori pjesë në takimet dhe workshopet e organizuara në datat 27-30 shtator 2015 nga kjo qendër, ku referoi dhe bashkëbisedoi në lidhje me kontributin e hoxhallarëve të shkuar të Shkodrës dhe medresetë e saj.
               
Gjatë këtyre takimeve, Myftiu hodhi dritë mbi formimin e elitës së hoxhallarëve të Shkodrës dhe kontributin e tyre në shumë sfera të dijes. Ai tha se hoxhallarët ishin të parët në krye të përpjekjeve për edukimin e shoqërisë me vlerat më të larta të besimit, dijes, respektit dhe mësimit të gjuhës shqipe, ruajtjes së vlerave islame dhe trashëgimin e tyre.
               
Në takimet e tij, Myftiu diskutoi edhe mbi fenomenet negative të osmanofobisë dhe islamofobisë, që po përhapen dukshëm në Shqipëri, duke theksuar se injoranca dhe urrejtja patetike shekullore ndaj Islamit dhe muslimanëve, po konkretizohet edhe në veprimet e atyre, që i quajti “misionarë të së keqes” në shoqërinë shqiptare.
               
Myftiu vlerësoi faktin se gjatë periudhës së kalifatit osman, shqiptarët jetuan ditët e tyre më të mira, të integruar plotësisht në këtë bashkim shtetesh, racash, kulturash e popujsh, ku dominonte drejtësia, paqja, besimi dhe vlerësimi i dijes dhe i dijetarëve.
               
Myftiu kërkoi që të studiohen arkivat dhe të dalë në pah e vërteta e marrëdhënieve të shqiptarëve me kalifatin osman, duke theksuar se historia e kësaj marrëdhënie në Shqipëri, është e trilluar dhe e deformuar për interesat  e lobimeve të njohura antiislame, që dihen.
               
Gjatë qëndrimit të tij në Stamboll, Myftiu bashkëbisedoi edhe me një grup pedagogësh dhe studentësh që ndjekin studimet pasuniversitare në Universitetin e Marmarasë, ku iu përgjigj edhe pyetjeve të shumta në lidhje me temën e tij.
               
Gjatë kësaj vizite, Myftiu takoi edhe dijetarin e shquar, Shejkh Muhammed Emin Siraxh, nxënësi i dijetarit të madh Shejkh Muhammed Zahid El-Keutheri, që ishte edhe zëvendësi i Shejkhul-Islamit të fundit në kalifatin osman, Shejkhul-Islam Mustafa Sabri.
               
Njëkohësisht, Myftiu takoi edhe dekanin e Fakultetit Teologjik në Universitetin e Stambollit, prof. dr. Murteza Bedir, dekanin e Fakultetit Teologjik në Universitetin Shehir, prof. dr. Mehmet Ali Büyükkara, dekanin e Fakultetit Teologjik në Universitetin Marmara, prof. dr. Ali Köse, koordinatorin e Zyrës për Marrëdhënie Ndërkombëtare në Fakultetin Teologjik Marmara, as. prof. dr. Ertuğrul Boynukalin e të tjerë personalitete të shquara të botës akademike dhe studimeve osmane dhe islame në këto institucione, me të cilët diskutoi dhe për mënyrat e rritjes së bashkëpunimit në fushat e studimeve osmane dhe islame, si dhe dërgesën e studentëve shkodranë për të vazhduar studimet e tyre të specializuara në këto universitete të shquara, jo vetëm në Turqi.
               
Gjatë qëndrimit të tij në Stamboll, Myftiu dha edhe një intervistë për TRT1, sikurse vizitoi varrin e sahabiut të nderuar Ebu Ejjub El-Ensari, në xhaminë e famshme, ku prehet trupi i tij, sikurse vizitoi edhe varrin e Sulltan Mehmet Fatihut, bri xhamisë që mban emrin e këtij burri të madh dhe udhëheqësi të pashoq.

 

---