Myftinia Shkodër

Ditën e xhuma, më 25 shtator 2015, në ditën e dytë të Kurban Bajramit të sivjetshëm, Myftiu i Shkodrës, Imam Muhamed B. Sytari zgjodhi xhaminë e fshatit Bardhaj, për të mbajtur mesazhin e tij të javës, nëpërmjet hytbes së xhumasë.

Gjatë fjalës së tij, Myftiu u përqendrua te rëndësia që ka lidhja dhe afrimi i muslimanëve, për të ndjerë secili përgjegjësinë e vëllazërisë së shenjtë islame në marrëdhënie me tjetrin.

"Ka shumë rëndësi në jetën tonë të përditshme, të mendojmë dhe të ndjejmë edhe për tjetrin, për muslimanin në nevojë, që mund të jetë i afërt, komshi, mik, i panjohur, por mbi të gjitha, një njeri i rregullt që ka besimin tonë dhe fenë, që e kemi të shtrenjtë. Mos të mendojë askush se pasuria (sado e pakët që të jetë), mund të pakësohet, kur japim për hir të Tij!" - tha ndër të tjera Myftiu.

Gjatë hytbes së kësaj jave, Imam Muhamed Sytari dha një sihariq të gëzueshëm për krejt besimtarët muslimanë të fshatit Bardhaj, që lidhet me ndërtimin e minares së xhamisë së këtij fshati.Myftiu uroi të pranishmit me rastin e Kurban Bajramit dhe tha se ditët e festës, duhet të shërbejnë për të na afruar edhe më shumë në rrugën e shërbimeve ndaj fesë dhe besimit tonë.

 

---