Myftinia Shkodër

Që në orët e para të sabahut të ditës së enjte, më 24 shtator 2015, në të gjitha xhamitë e Myftinisë Shkodër kanë nisur ceremonitë e faljes së Kurban Bajramit, si një ditë e shënuar e kalendarit islam.

Sipas programit të paralajmëruar nga Myftinia Shkodër, në xhaminë e Parrucës, ceremonia ka nisur me faljen e namazit të sabahut me xhemat nën drejtimin e imamit të kësaj xhamie, teologut Naim Drijaj.

Pas namazit, në dersin e parë të kësaj dite, Myftiu i Shkodrës, Imam Muhamed B. Sytari ka folur mbi rëndësinë që ka forcimi i vëllazërisë në mesin e muslimanëve. Duke iu referuar ajeteve dhe haditheve të shumta, Myftiu ka thënë se sot, më shumë se asnjëherë, muslimanët e kanë për detyrë të interesohen për njëri-tjetrin dhe të punojnë për forcimin e vëllazërisë në mes vete dhe forcimit të harmonisë në mes tyre.

Në dersin e kësaj dite, Myftiu theksoi se uniteti i muslimanëve dhe respektimi i të drejtave të tyre, është një shtyllë e rëndësishme dhe e fortë e vetë harmonisë kombëtare.

Ceremonia e kësaj dite në xhaminë e Parrucës, vijoi me dersin e teologut Naim Drijaj, që mbajti njëkohësisht edhe hytben e Kurban Bajramit.

Ndërkohë, Myftiu mori pjesë edhe në ceremoninë e xhamisë “Ebu Bekër”, në Fushë-Çelë, ku dha mesazhet e tij për të pranishmit e shumtë, që kishin tejmbushur xhaminë dhe oborrin e saj.

Pas dersit të mbajtur nga teologu Arben Halluni, Myftiu u përqendrua te bashkëpunimi i muslimanëve në rrugën e dëshmimit të vlerave të besimit dhe fesë së tyre në realitetet e përditshme.

Myftiu tha se harmonia në mesin e muslimanëve, është një çështje parësore, që lidhet me vetë krenarinë dhe cilësinë e prezantimit të tyre në komunitet. Njëkohësisht tha se muslimanët, janë njerëz që janë ftuar ta ndërtojnë jetën, shoqërinë, të nderojnë dhe respektojnë këdo, pavarësisht dallimeve fetare, kombëtare, kulturore etj.

Në këtë kontekst, Imam Muhamed Sytari vuri theksin te ajo që ndodh prej kohësh në Siri dhe Irak, ku tha se terrorizmi dhe ekstremizmi fetar në emër të Islamit, është një prodhim joislam, që nuk ka dhe nuk mund të ketë lidhje me Islamin burimor dhe thelbin e mësimeve të tij.

Në këtë mesazh, Myftiu përmendi edhe faktin e mirësisë së pranisë së xhamive në shoqëri, ku tha se pas pak javësh do të përkujtohet 20 vjetori i inaugurimit të xhamisë “Ebu Bekër”, si dhe 25 vjetori i rihapjes së xhamisë së Plumbit.

Pas faljes së namazit të Kurban Bajramit, nën drejtimin e Myftiut, hytbeja e Kurban Bajramit u mbajt nga imami i xhamisë “Ebu Bekër”, teologu Idmir Plaku. Në fjalën e tij, imami i nderuar dha mesazhe të rëndësishme që lidhen me harmoninë dhe paqen në mesin e njerëzve.

Imami Idmir Plaku theksoi se mesazhet e Kurban Bajramit janë nxitëse për të reflektuar besimin dhe përkushtimin në jetë, për t’u dëshmuar muslimanë të dobishëm dhe njerëz me vlera fetare e shoqërore.

Ceremonitë e Kurban Bajramit, u zhvilluan rregullisht edhe në të gjitha xhamitë e tjera të Shkodrës, duke dëshmuar mirësitë dhe begatitë e kësaj dite feste dhe adhurimi.

 

---