Myftinia Shkodër

Ditën e mërkurë, më 23 shtator 2015, në prag të Kurban Bajramit të sivjetshëm, Myftiu i Shkodrës, Imam Muhamed B. Sytari ishte i ftuar i gazetarit Ergys Kavaja në emisionin "Studio e hapur", ku iu përgjigj pyetjeve të ndryshme që lidhen me kuptimet dhe mesazhet e festës së Kurban Bajramit, përgatitjes së Myftinisë Shkodër për pritjen e 16 nëntorit, si datë që shënon 25 vjetorin e rihapjes së xhamisë së parë në Shkodër e Shqipëri, pas 23 viteve persekutim ateist.

Myftiu tha se Kurban Bajrami i këtij viti do të falet në të gjitha xhamitë e Shkodrës, si shenjë falënderimi ndaj Zotit dhe si përkujtimi që duhet t'i bëjmë njëri-tjetrit për vlerën dhe mirësinë e xhamive, sidomos tani në prag të 25 vjetorit të rihapjes së xhamisë së parë pas 23 viteve persekutim.

Myftiu iu përgjigj edhe shumë pyetjeve të tjera që lidhen me pronat e Myftinisë Shkodër, vizitën e fundit te Kryetarja e re e Bashkisë Shkodër, domethënia e dhuratës së bërë, debatin që shkaktoi ajo etj.

Myftiu tha se xhamia e kalasë është një temë që nuk ka nevojë për asnjë diskutim, pasi në pesë shekujt e fundit ka funksionuar si e tillë. Ai tha se dekadave të fundit është abuzuar me emërtimin e xhamisë, por kjo, sikurse tha Myftiu i Shkodrës, duhet mbyllur një herë e përgjithmonë. "Ai objekt është xhami dhe askush nuk ka asnjë të drejtë të pretendojë shfrytëzimin e saj, duke u nisur nga origjina e largët e xhamisë" - tha Myftiu.

Temë e këtij emisioni ishte edhe ajo e legalizimit të pronave, ku Myftiu konfirmoi se komunitetet fetare nuk ka se si të jenë të barabarta në këtë trajtim, sepse përqindjet e tyre, janë shumë të largëta, që të trajtohen të barabartë. Për këtë, ai tha se do të kishte dëshiruar që qeveritë e këtyre 25 viteve, të kishin kryer fillimisht me pronat e krejt komuniteteve të vogla, pastaj të ishte marrë me ato të muslimanëve, që jomuslimanët në këtë vend, të mos kenë vështirësi dhe të mos ndjehen inferiorë dhe të kompleksuar.

Myftiu iu përgjigj edhe pyetjes që lidhet me dhunën, vrasjet, terrorizmin dhe ekstremizmin e shfaqur kohëve të fundit në vendet islame, si dhe atakimin pa të drejtë të Islamit në këtë drejtim, ku konfirmoi qëndrimin e Islamit ndaj këtyre fenomeneve negative dhe vrastare.

Në fund, Myftiu uroi besimtarët për Kurban Bajramin, sikurse u lut që njerëzit të shpëtojnë nga klima e frikës, dhunimit psikologjik, mjerimit, varfërisë e skamjes, që ka kapluar vendin.

Emisioni do të ritransmetohet sonte, të mërkurën, më 23 shtator 2015, në orën: 20.35, në tv starplus.

 

---