Myftinia Shkodër

Pasditën e së hënës, më 14 shtator 2015, Myftinia Shkodër, organizoi ceremoninë e përvitshme të shpërndarjes së ihrameve të haxhilerëve shkodranë të këtij viti.

Pas faljes së namazit të iqindisë, me xhemat, në xhaminë e Parrucës, ceremonia nisi me mesazhet e dhëna nga teologu Arben Halluni, i cili theksoi se haxhi është një adhurim i mrekullueshëm, që bashkon muslimanët e mbarë botës në një takim të pashembullt adhurimi dhe reflektimi mbi jetën dhe realitetet e ymmetit islam.

Më pas, Myftiu i Malësisë së Madhe, H. Edmir Smajlaj, dha këshillat e tij për haxhilerët e këtij viti. Ai u ndal te stacionet e ndryshme, nëpër të cilat do të kalojnë haxhilerët, duke porositur shfrytëzimin maksimal të kohës dhe shtimin e dhikrit dhe duave, sidomos në Arefat.

Më pas, të pranishmit i përshëndeti imami i nderuar, H. Agim Hoxha, i cili këndoi një ilahi të bukur kushtuar haxhilerëve, duke dhuruar emocione të bukura.

Ceremonia vijoi me fjalën e Myftiut të Zonës të Shkodrës, Imam Muhamed B. Sytari, i cili tha se aktiviteti i sotëm ka një mesazh të fortë, që vërteton se shkodranët dhe shqiptarët nuk ia kanë kthyer shpinën Islamit të tyre. Ai tha se nesër, në mesin e miliona haxhilerëve nga mbarë bota, do ta shohin të gjithë flamurin tonë kombëtar, teksa valëvitet në qiejt e vendeve më të shenjta të botës, duke dëshmuar Islamin e shqiptarëve.

Më pas, Myftiu bëri një lutje në gjuhën shqipe, për mbarësinë dhe pranimin e haxhilerëve të këtij viti.

Ceremonia vazhdoi me leximin e emrave të 22 haxhilerëve shkodranë të këtij viti, dorëzimin e pasaportave me vizat përkatëse, ihramin dhe orenditë e tjera shoqëruese.Të pranishmit, u përshëndetën me haxhilerët, të cilët, me mbarësinë e All-llahut, udhëtojnë ditën e nesërme drejt vendeve të shenjta për kryerjen e haxhit të sivjetshëm.

 

---