Myftinia Shkodër

Ditën e xhuma, më 4 shtator 2015, me ftesë të Myftiut të Shkodrës, hytbeja e xhumasë në xhaminë e Parrucës, u mbajt nga Hafiz Etem Haliti, nga Gostivari.

Në fillim të hytbes së tij, Hoxha i nderuar shprehu emocionet e tij dhe mirënjohjen drejtuar Shkodrës dhe muslimanëve të saj, për mikpritjen dhe bashkëpunimin, sidomos në periudhën e pas vitit 1993, kur ai shërbeu si imam, vaiz dhe mësues feje në Shkodër.

Gjatë hytbes së xhumasë, H. Etem Haliti ftoi muslimanët që të bashkohen në qëllime të larta, duke mënjanuar elementët e ndarjes dhe mosmarrëveshjes, duke u dëshmuar si një shoqëri e lidhur dhe e fortë në vetvete.

Ai tha: "Mos të bëjmë sot veprime, për të cilat, brezat që do vijnë, do na qortojnë! Asnjëherë në historinë islame vllavrasja në mes muslimanëve është quajtur xhihad! Kjo që po shohim sot, nuk ka arsyetim islam, nuk ka lidhje me fenë tonë! Ndoshta, pas dy a tre shekujsh, brezat e ardhshëm do ta quajnë këtë që jetojmë sot, si: mesjeta islame, ndonëse muslimanët nuk kanë kaluar kurrë "mesjetë", si popujt e kulturat e tjera!"

Pas përfundimit të namazit të xhumasë, H. Etem Haliti këmbeu urime dhe lutje me xhematin e shumtë, që kishin ardhur ta takonin dhe ta uronin për mesazhet e dhëna në hytben e sotme.

 

---