“Prisja të shihja pranë çdo xhamie,
një fabrikë dhe, pranë çdo minareje, një oxhak!”
31 gusht 2015
Tashmë, që numrin një
në klasifikimin e temave për debat në
rrjetet sociale (dhe përtej tyre), e ka
zënë "birra pa alkool" dhe larmia e
ecejakeve, plot tekste e argumente,
pyetje-përgjigje e kundërpërgjigje, u
ndala për pak dhe, teksa po ndiqja
kurbën e këtij "debati", si një shirit
dëshmues, para syve më kaluan 25 vitet e
fundit, të mbushura me debate e
tematika, si kjo e fundit, që kanë zënë
kohën e një pjese të mirë të njerëzve,
plot "tha" e "thotë".
M'u kujtuan debatet pa lidhje të ditëve
të para, të pas vitit '90 rreth disa
temave krejtësisht të padobishme dhe
nxitëse të përgjumjes intelektuale, si:
ajo e pozicionimit të duarve në namaz,
rreth tubimit a jo për "mevlud", për
mbledhjen a jo për Hatmen e plotë të
Kur'anit në Ramazan, për numrin e
rekateve të teravisë, për abdestin pa
larjen e këmbëve (thjeshtë prekjen me
dorë të çorapeve), për thirrjen "amin"
me zë të lartë pas imamit, (pas
këndimeve me zë), për mosbërjen e
dhikreve me xhemat, për... e sa shumë
për-e...
Ndërkohë, nga viti 1990, (nga fillimi i
nëntorit të atij viti) e në vazhdim,
deri sot, (kur po paguajmë haraçet e
përgjumjes së elitave tona islame, teksa
dëgjojmë mllefe dhe urrejtje kundër
Islamit dhe muslimanëve nga megaphone,
që shpërndajnë vner falas, ditë pas
dite), temat e lartpërmendura vazhdojnë
të kërkojnë të imponohen si frymëzime
elitare, në mesin e muslimanëve..?!
Pastaj u ndala për pak dhe ktheva kokën
nga e kaluara; e largëta e afërt (ajo e
25 viteve) dhe e afërta e afërt (e
ditëve dhe muajve të fundit). Ngado
islamofobi! Islamofobi e përkthyer në
lëvizje politike. Islamofobi e përkthyer
në kulture. Islamofobi e përkthyer në
investime publike. Islamofobi e
përkthyer në hapësira televizive e
mediatike!?
Pastaj m'u kujtua rrëfimi i kryemyftiut
të Sirisë, Shejkh Ahmed Keftaro
(1915-2004), i cili tregon për një
bisedë me presidentin e Pakistanit, Ejub
Han, gjatë një vizite në Pakistan, (në
mbështetje të qëndrimeve të këtij vendi,
në lidhje me çështjen e Kashmirit).
Thotë: Presidenti më pyeti: Si të duket
Islami në Pakistan?
Ia ktheva: Islami në Pakistan, më duket
i dobët!
Tha: Si?
Ia ktheva: Kur e vizitova Pakistanin më
parë, gjeta shumë xhami të bukura dhe
minare tërheqëse. Tash, pas dhjetë
viteve, në këtë vizitë të dytë, prisja
të shihja pranë çdo xhamie, një fabrikë
dhe, pranë çdo minareje, një oxhak! Po
ta gjeja këtë, pas dhjetë viteve nga
vizita ime e parë, do thoja se Islami në
Pakistan, është ashtu si duhet të jetë!
...
Në fakt, realitetet e ndërlikuara
shqiptare, ku janë përzier shumë duar
(të papastra, më shumë të papastra, a më
pak të papastra), kanë më shumë nevojë
se kurrë për investimin tonë në dobi të
lartësimit të komunikimit tonë fetar dhe
social, si pjesë integrale e këtij
vendi.
Është më e pakta, që i detyrohemi
Shqipërisë tonë, xhamive të saj, nivelit
të komunikimit në mes vete, përpjekjes
për të qenë faktor esencial në realitete
të vjedhura e të marra peng, kudo
përreth nesh!
Pa e ndryshuar mënyrën e të menduarit
dhe të sjelljes në mes nesh dhe përtej
komunitetit tonë, do të vazhdojmë të
dëgjojmë korba e gjarpërinj të zinj, që
nuk reshtin së përmbushuri misionin e
tyre shekullor kundër Islamit dhe
muslimanëve, në të gjitha mënyrat dhe
format e mundshme, legjitime dhe
ilegjitime, morale dhe imorale.
Imam
Muhamed B. Sytari
Shkodër, 31. 8. 2015
 |
