H. Burhan Fili mban hytben e xhumasë
në xhaminë e Parrucës
28 gusht 2015
Me ftesë të Myftiut
të Shkodrës, Imam Muhamed Sytari, ditën
e xhuma, më 28 gusht 2015, H. Burhan
Fili, mbajti hytben e xhumasë në xhaminë
e Parrucës.
Gjatë saj, thirrësi islam me banim dhe
aktivitet në Michigan të ShBA, foli mbi
rëndësinë e vlerësimit të mirësisë së
udhëzimit në jetë dhe falënderimin ndaj
Zotit të gjithësisë, prej të Cilit janë
krejt mirësitë në jetë.
Ai bëri thirrje që njerëzit ta
shfrytëzojnë kohën për të gjetur dritën
e besimit, për të prekur udhëzimin dhe
për t'u përkushtuar në jetë, me dëshirën
e mirë të ndërtimit.
H. Burhan Fili iu referua ajeteve dhe
haditheve, që nxisin shfrytëzimin e
jetës në shërbim të vlerave të udhëzimit
hyjnor dhe fyteve të besimit.
Me shumë emocion, ai rrëfeu edhe
momentet e vështira të arratisjes nga
vendlindja dhe ndihmën e Zotit ndaj tij,
për t'u larguar në botën e lirë, ku edhe
u arsimua dhe zgjodhi rrugën e thirrjes
islame, me urtësi e largpamësi.
Pas namazit të xhumasë, H. Burhan Fili u
takua me besimtarë të shumtë, që e uruan
për hytben e xhumasë dhe për kontributet
e tij të vyera, sidomos pas vitit '90,
në shërbim të rimëkëmbjes së Thirrjes
Islame.
 |
 |
 |
 |
 |
 |
 |
