Myftinia Shkodër

Pasditën e së martës, më 25 gusht 2015, Myftiu i Shkodrës, Imam Muhamed B. Sytari, në shoqëri të teologëve dhe imamëve të nderuar, H. Fejzi Zaganjori, Arben Halluni, Idmir Plaku, Lavdrim Hamja dhe Lulzim Beqiri, zhvilloi një vizitë në shtëpinë e Hoxhës së moshuar, H. Musa Hoxha.

I gëzuar për vizitën e Myftiut me imamë, H. Musa Hoxha, shprehu kënaqësinë e tij për këtë takim të përzemërt, që e konsideroi si shenjë respekti dhe nderimi për zotërinë e tij.

H. Musa Hoxha, iu drejtua Myftiut me imamë, me disa këshilla të dobishme dhe njëkohësisht u kujtoi atyre kohët e shkuara, me hoxhallarë të nderuar të Shkodrës, si: H. Muhamed Bekteshi, H. Sabri Bushati etj, prej të cilëve ka marrë mësime për vite. Ai kërkoi që aktiviteti i Myftinisë të jetë i vazhdueshëm, cilësor dhe nv shërbim të interesave të besimtarëve, por edhe të krejt muslimanëve, praktikantë a jo qofshin ata.

Nga ana e tij, Myftiu i Shkodrës, vlerësoi se kjo vizitë është një shenjë respekti dhe mirënjohjeje për një brez të nderuar hoxhallarësh, që shërbyen me përkushtim dhe nuk hoqën dorë nga shërbesat fetare as në ditë të vështira, si ato që pasuan shkurtin e vitit 1967.

Gjatë kësaj vizite, Myftiu e informoi Hoxhën e moshuar për aktivitetin e Myftinisë Shkodër dhe kërkoi prej zotërisë së tij lutje për mbarësinë e mëtejshme.

H. Musa Hoxha ka lindur në vitin 1926 dhe është i fundit i brezit të tij, si dëshmitar i gjallë i mësimeve të vyera dhe ixhazeteve nga hoxhallarët e shkuar të Shkodrës.

 

---