Myftinia Shkodër

Paraditën e së martës, më 25 gusht 2015, Myftiu i Shkodrës, Imam Muhamed B. Sytari, priti në një takim të përzemërt, thirrësin islam, H. Burhan Fili, me banim në Michigan dhe veprimtari të gjerë në ShBA dhe përtej tyre.

Fillimisht, Myftiu ka shprehur kënaqësinë e tij për këtë vizitë të z. Burhan Fili, të cilin e ka falënderuar për kontributin e tij, sidomos në fillimet e rimëkëmbjes së Thirrjes Islame në Shkodër e Shqipëri, pas vitit '90.

Nga ana e tij, thirrësi islam, H. Burhan Fili, ka falënderuar Myftiun dhe bashkëpunëtorët e tij për angazhimet e tyre në shërbim të aktivitetit të larmishëm islam në Shkodër. Ai ka kujtuar me emocion, momente nga bashkëpunimi me të nderuarit, Imam Vehbi Ismaili dhe Shejkh Vehbi Sulejmani, në kuadër të ndihmës për ripërtëritjen e Thirrjes Islame në Shkodër, në vitet e para të rilejimit me ligj të fesë.

Ai ka këshilluar që bashkëpunimi të jetë sa më i madh, i gjerë dhe gjithëpërfshirës, në dobi të përhapjes së vlerave islame në qytetin e Shkodrës.

Më pas, bisedat e ngrohta janë përqendruar te aktiviteti botues dhe përgatitjet e Myftinisë Shkodër për përkujtimin sa më dinjitoz të 25 vjetorit të rihapjes së xhamisë së parë, pas ndryshimeve politike në vendin tonë, në vitin 1990.

Me këtë rast, Myftiu e ka ftuar thirrësin islam, H. Burhan Fili, për të qenë pjesë e këtij përkujtimi, si pjesë e aktiviteteve të larmishme në kuadër të këtij eventi me vlera lokale dhe kombëtare. Njëkohësisht e ka lajmëruar të nderuarin H. Burhan Fili për vullnetin e Myftinisë Shkodër, që zotëria e tij të jetë një ndër personalitetet e nderuara në këtë përvjetor jubilar.

 

---