Myftinia Shkodër

Ditën e xhuma, më 21 gusht 2015, pas namazit të xhumasë në xhaminë e Parrucës, ku mbajti edhe hytben, Myftiu i Shkodrës, Imam Muhamed B. Sytari, priti në një takim të ngrohtë e vëllazëror, Mr. Reshat Ibishin, Kryetar i BFI të Italisë, me qendër në Mantova.

Në këtë takim, z. Ibishi shoqërohej edhe nga z. Eljasa Mahmudi, imam në Kumanovë dhe studiuesi i shquar, z. Elez Ismaili.

Kësaj vizite, iu bashkua edhe një delegacion besimtarësh nga Turqia, të drejtuar nga Hafiz Emin Arik, ish-Myfti i qytetit Bodrum, i cili drejtoi edhe namazin e xhumasë së sotme në xhaminë e Parrucës.

Gjatë këtij takimi vëllazëror, Myftiu i njohu vizitorët e nderuar me historikun e Myftinisë Shkodër, ku theksoi se sivjet përkujtohet 25 vjetori i lirisë së besimit në Shkodër dhe mbarë Shqipërinë. Njëkohësisht i prezantoi vizitorët edhe me disa prej botimeve të reja të Myftinisë Shkodër në kuadër të aktiviteteve që përkojnë me këtë datë të rëndësishme.

Nga ana e tij, Mr. Reshat Ibishi, e informoi Myftiun për aktivitetin e BFI të Italisë në Mantova, ku sivjet do të përkujtohet 10 vjetori i formimit të kësaj qendre të rëndësishme islame të shqiptarëve atje.

Myftiu falënderoi edhe miqtë nga Turqia, të cilët i uroi për këtë vizitë të këndshme dhe vëllazërore, sikurse pranoi urimet dhe lutjet e tyre më të mira për mbarësinë e punës dhe aktivitetit të Myftinisv Shkodër.

I pranishëm në këtë takim ishte edhe Dr. Genti Kruja, drejtor i kulturës në KMSh, si dhe një grup imamësh të Myftinisë Shkodër.

 

---