Myftinia Shkodër

Ditën e mërkurë, më 19 gusht 2015, Myftiu i Shkodrës, Imam Muhamed B. Sytari, priti në një takim të përzemërt, studiuesin islam, Mr. Muhidin Ahmeti, pas ligjëratës që ai mbajti në xhaminë e Parrucës, në aktivitetin e zhvilluar nga Myftinia Shkodër, ditën e sotme.

Në takim, Myftiu, pasi falënderoi Mr. Muhidin Ahmetin, për ligjëratën e tij të dobishme, tha se është e domosdoshme që xhematet dhe muslimanët në përgjithësi, të përballen me trajtesa intelektuale, që thyejnë tabutë e ligjërimit të sotëm fetar dhe rutinën e përditshme me të cilën ata përballen. Ai tha se muslimani i sotëm duhet të dalë nga rutina e përditshme, duke u thelluar edhe më shumë në arsyetimet fetare, për ta kuptuar fenë dhe për t'u thelluar në kuptimet e saj të mrekullueshme.

Ndërkohë, Mr. Muhidin Ahmeti foli edhe për eksperiencën e tij pozitive në Austri, ku theksoi se shteti e respekton fenë, lënda e edukatës fetare është pjesë e kurrikulave të arsimit shtetëror atje, sikurse dha informacione të dobishme mbi ligjin e ri mbi fetë, të miratuar nga qeveria austriake dhe organizimin e Bashkësisë Islame të Austrisë.

Bashkëbisedimi u soll edhe rreth aktualitetit të botës islame dhe Thirrjes Islame në përgjithësi, sikurse u diskutua edhe rreth botimeve dhe dobisë së tyre për komunitetin.

Të pranishëm në këtë bashkëbisedim, ishin edhe z. Ardit Hoxhllaku, Myftiu i Tepelenës, z. Alban Kali, kryeredaktor i revistës "Etika", si dhe z. Lavdrim Hamja, kryeredaktor i gazetës "Udha Islame".

Për nder të kësaj vizite, Myftiu i Shkodrës, shtroi një drekë falënderimi.

 

---