Myftinia Shkodër

Në një intervistë për "Zërin e Amerikës", të enjten, më 6 gusht 2015, Myftiu i Shkodrës, Imam Muhamed Sytari, theksoi se sekuestrimi i pronave të Myftinisë së Shkodrës dhe mbarë Komunitetit Mysliman të Shqipërisë, në vitin 1967, ishte një goditje e madhe dhe e rëndë për Islamin dhe muslimanët në vendin tonë.

Ai tha, se përtej kësaj, peripecitë e hasura gjatë 25 viteve të demokracisë, janë të panumërta, sa vetë numri i dosjeve të Myftinisë Shkodër, vakëfeve të patrajtuara ende, që e kalojnë numrin 100 dhe akoma kanë ngelur në pluhur në sirtaret e institucioneve shtetërore.

Gjatë kësaj interviste, Myftiu tha se nga viti 2006 e deri më sot, Myftinia Shkodër ka depozituar pranë ALUIZNI-t, Shkodër, rreth 60 dosje, për legalizimin e plotë të krejt xhamive dhe medreseve të saj.

Myftiu vlerësoi vizitën e sotme të Drejtorit të Përgjithshëm të ALUIZNI-t të Republikës së Shqipërisë, z. Artan Lame dhe dorëzimin e dy procedurave të miratuara, duke e konsideruar këtë si një fillim të mbarë deri në përfundimin e plotë të këtij procesi të gjatë e të vështirë.

Myftiu theksoi se vonimi i deritanishëm në kthimin e pronave dhe legalizimin e objekteve, ka ndikuar edhe në financimin e Thirrjes Islame në Shkodër.

"Kthimi i plotë i pronave tona legjitime dhe shfrytëzimi i duhur i tyre, do të rregullonte përfundimisht edhe financimin e imamëve dhe Thirrjes Islame në vendin tonë. Kështu, është më e lehtë të ndërtohen xhami, shkolla, biblioteka, qendra biznesi, prej të cilave mund të ndihmohen të varfërit e skamnorët etj.", - tha Myftiu.

 

---