Myftinia Shkodër

Ditën e enjte, më 6 gusht 2015, Myftiu i Shkodrës, Imam Muhamed Sytari, priti në një takim pune, Drejtorin e Përgjithshëm të ALUIZNI-t, të Republikës së Shqipërisë, z. Artan Lame.

Gjatë këtij takimi, u diskutua mbi vlerën e madhe që kanë pronat e shenjta vakëf për Myftininë Shkodër, si dhe nëpërkëmbjen e madhe që u është bërë këtyre pronave në dekadat e fundit.

Myftiu vlerësoi vizitën e z. Lame dhe e konsideroi atë si një moment të rëndësishëm, për nisjen e fazës përfundimtare të legalizimit të plotë të krejt xhamive dhe medreseve, mbi tokat e tyre legjitime.

Nga ana e tij, Drejtori i Përgjithshëm i ALUIZNI-t, z. Artan Lame, vlerësoi se pronat e Myftinisë Shkodër dhe të krejt komuniteteve fetare, duhen respektuar dhe duhen kthyer në identitet.

Ai tha se procesi i legalizimit duhet të ishte mbyllur me kohë, por ky proces do të konkretizohet i plotë, aq më tepër në rastin e xhamive të reja, që sipas të dhënave të sakta, janë ndërtuar mbi gjurmët e xhamive të shkuara, pa shkelur në prona të huaja.

Me rastin e këtij takimi, z. Lame i dorëzoi Myftiut të Shkodrës, procedurën e përfunduar të legalizimit të dy xhamive, duke theksuar se ky proces sapo ka nisur dhe se së shpejti do të vijohet me plotësimin e plotë të kërkesave të depozituara nga Myftinia Shkodër.

Ndërkohë, në prani të mediave të pranishme, Imam Muhamed Sytari theksoi se, pavarësisht faktit se nga viti 2006, Myftinia Shkodër ka depozituar të gjithë dokumentacionin e plotë për legalizimin e rreth 60 objekteve të saj, marrja e këtyre dy dokumenteve, mbetet një shenjë pozitive që duhet vlerësuar. "Shpresoj dhe lutem, që deri më 16 nëntor 2015, ditën e 25 vjetorit të ripahjes së xhamisë së Plumbit, të ketë përfunduar edhe legalizimi i plotë i krejt xhamive dhe medreseve të Shkodrës.", - tha Myftiu.

 

---