Myftinia Shkodër

Ditën e shtunë, më 1 gusht 2015, për nder të vëllezërve të Forumit të Rinjve Muslimanë, nga Zvicra dhe Austria, të cilët ndodhen për vizitë në Shkodër nga dita e djeshme, Myftinia Shkodër kishte përgatitur një program të larmishëm.

Programi nisi me faljen e namazit të sabahut në xhaminë e re të "Dy Vajzave", që me kërkesë të Myftiut, Imam Muhamed Sytari, u drejtua nga Drejtori i përgjithshëm i FRM, Mr. Ahmed Mehmedi.

Më pas, Myftiu bëri një përshkrim të historisë së vakëfit të vjetër të Shaban efendisë dhe historinë e ndërtimit të këtij kompleksi bashkëkohor islam, që mban emrat e dy vajzave kuvajtiane, "Sara dhe Shehd"...

Më pas, vëllezërit vizituan edhe xhaminë e re të lagjes Dudas, ku shprehën kënaqësinë e tyre për këtë ndërtim të bukur, që e hijeshon Shkodrën duke u bërë një gjurmë tërheqëse drejt vlerave islame të këtij qyteti dhe banorëve të tij.

Pas sofrës së mëngjesit, ku u këmbyen urime, lutje dhe dhurata simbolike, u vijua me vizitën e disa vendeve historike islame të qytetit, ku spikat vizita e xhamisë së kalasë së Shkodrës dhe e muzeut të saj.

Gjatë kësaj vizite, u theksua se gjurmët shekullore islame në Shkodër janë që para periudhës osmane, por në atë periudhë të artë, ato lulëzuan dhe morën hov edhe më tepër.

Mr. Ahmed Mehmedi, shprehu kënaqësinë e tij të madhe për vizitën e bërë në xhaminë shekullore të kalasë së Shkodrës dhe theksoi se kjo gjurmë e shtrenjtë duhet të ketë vëmendje të përqendruar, me qëllim rikonstruksionin e saj dhe shfrytëzimin edhe për qëllime adhurimi, si në të shkuarën.

Vizita vazhdoi edhe pranë zonës së xhamisë së Plumbit dhe gjurmëve të xhamisë së Qafës.

Pjesë e këtij programi në nder të vëllezërve të FRM-së ishte edhe biseda e z. Kujtim Dervishi, drejtor i Medresesë "Haxhi Sheh Shamia", i cili bëri një përshkrim të arritjeve të deritanishme të Medresesë së Shkodrës, si një shkollë elitare në rang kombëtar.

Vizitorët u ndalën edhe tek përmendorja e komandant Hasan Riza Pashës, si një simbol i shtrenjtë i Shkodrës dhe kontributit historik të muslimanëve të saj në mbrojtje të Shkodrës nga rrethimi malazez i vitit 1913.

Pas një pushimi të shkurtër, pas drekës së sotme, vëllezërit e FRM-së e mbyllën vizitën në Shkodër, me përshtypjet më të mira dhe me dëshirën e takimeve të tjera, që forcojnë ndjenjat vëllazërore dhe rrisin bashkëpunimin e ndërsjellët.

 

---