Myftinia Shkodër

Pasditën e së xhumasë, më 31 korrik 2015, mbërriti për një vizitë në Shkodër, një delegacion i Forumit të Rinjve Muslimanë, me qendër në St. Gallen të Zvicrës.

Në krye të delegacionit ishte studiuesi islam, Mr. Ahmed Mehmedi, drejtori i përgjithshëm i FRM, që shoqërohej edhe nga kryetari i FRM, z. Mustafa Saliu, shefi i Qendrës për Kërkime dhe Studime Islame, z. Sulejman Iljazi etj.

Pas faljes së namazit të akshamit në xhaminë e Parrucës, Myftiu i Shkodrës, Imam Muhamed Sytari, pasi uroi të pranishmit për adhurimin e kësaj nate të re, vlerësoi vizitën e studiuesit islam, Mr. Ahmed Mehmedi, si dhe delegacionit të Forumit të Rinjve Muslimanë, nga Gostivari, me banim dhe aktivitet në St. Gallen të Zvicrës.

Myftiu tha se kjo është një natë e mirë dhe një vizitë plot mall e vlera vëllazërore e diturore. Ai vlerësoi kontributin e Mr. Ahmed Mehmedit dhe tha se është në nderin e Myftinisë Shkodër ta ketë si mik të saj.

Ndërkohë, një fjalë përshëndetëse e mbajti edhe Hoxha i nderuar, Mr. Ahmed Mehmedi, i cili shprehu kënaqësinë e tij për këtë vizitë në Shkodër. Ai tha se është shumë e rëndësishme të kuptojmë vlerën e madhe të takimeve në mesin e muslimanëve shqiptarë nga të gjitha trevat e tyre, si një familje e madhe besimi dhe vlerash kombëtare.

Njëkohësisht vlerësoi pritjen dhe ngrohtësinë e besimtarëve në Shkodër.
Vizita vazhdoi edhe në zyrën e Myftiut, ku vizitorët u njohën me një historik të shkurtër të aktivitetit të Myftinisë Shkodër në 25 vitet e fundit.

Myftiu tha se përtej persekutimit fetar që pësuan muslimanët në periudhën e errët ateisto-komuniste, besimi triumfoi dhe rrezatoi paqe dhe qëndrueshmëri përballë fortunave të femohimit, që nuk janë ndalur ndonjëherë.

Më pas, delegacioni i FRM, së bashku me Myftiun dhe bashkëpunëtorët e tij zhvilluan një shëtitje në pedonalen e Bashkisë së qytetit dhe më pas kryen edhe faljen e namazit të jacisë me xhemat, në xhaminë "Ebu Bekër".

Pas namazit u zhvillua edhe një bashkëbisedim me këshilla fetare dhe lutje të përbashkëta vëllazërore.

 

---