Myftinia Shkodër

Ditën e xhuma, më 17 korrik 2015, në mbarë ymmetin islam u festua dita e parë e Fitër Bajramit, pas një muaji të begatë agjërimi, plot adhurime dhe lutje në kërkim të pëlqimit të Zotit të gjithësisë.
           
Në Shkodër, ceremonia kryesore e kësaj feste, u zhvillua në vakëfin e shenjtë, bri xhamisë “Ebu Bekër”, në sheshin e Fushë Çelës, ku u krye fillimisht falja e namazit të sabahut me xhemat, që u shoqërua me një program të ndërthurur me ligjërata, recitime dhe këshilla fetare.
           
Pas faljes së namazit të sabahut, të cilin e drejtoi teologu Idmir Plaku, imam i xhamisë “Ebu Bekër”, ceremonia nisi me leximin e një pjese kur’anore nga teologu Nadi Braqi, imam i xhamisë Dudas.
           
Më pas, ligjëruan imamët e nderuar, Idmir Plaku, Naim Drijaj dhe Lavdrim Hamja, të cilët trajtuan tema që lidhen me atmosferën shpirtërore pas Muajit Ramazan, domosdoshmërinë e shfrytëzimit të festave islame për të ruajtur dhe konsoliduar lidhjet farefisnore, si dhe si duhet të jetë muslimani në raport me vërtetësitë e thelbit të fesë së tij.
           
Në ligjëratat e tyre të dobishme, imamët e nderuar dhanë këshilla të vyera për besimtarët, për të ruajtur frymën e Ramazanit, për të vazhduar në rrugën e përkushtimit dhe për të rritur cilësinë e marrëdhënies vëllazërore në mes vete.
           
U theksua njëkohësisht se prej vlerave të Ramazanit ishte edhe shtysa për t’u tubuar në rrethe të ngushta dhe të gjera, ku kryefjala e këtyre takimeve ishte përkushtimi dhe ruajtja e ekuilibrave në jetë.
           
Me shumë emocion, të pranishmit dëgjuan pjesët poetike të interpretuara nga medresisti Enis Rexha, nga Ulqini, i cili i dha një shije të veçantë ceremonisë së këtij Bajrami.
           
Në orën 06.08, nën drejtimin e Myftiut të Zonës Shkodër, Imam Muhamed Sytari, u bë edhe falja e Fitër Bajramit. Pas saj, nën shoqërinë e tekbireve, Myftiu nisi të mbajë hytben e rastit, ku dha disa mesazhe të rëndësishme për besimtarët muslimanë të Shkodrës.
           
Në hytben e tij, Myftiu theksoi se Ramazani nuk ishte thjeshtë një stacion adhurimi, por një sistem jetese, që na merr për dore drejt një edukimi të mrekullueshëm, duke nisur me forcimin e bindjes së nuk ka Zot tjetër pos All-llahut, i Cili nuk ka as djalë as vajzë, as ka lindur prej kujt as ka lindur kush prej Tij, që nuk ia ka nevojën askujt dhe asgjëje dhe që çdo gjë, e njohur dhe e panjohur në këtë univers, është krijesë e Tij.
           
Myftiu tha se agjërimi na edukon me modestinë në jetë dhe shtrimin e rrugëve që shpien drejt ruajtjes dhe konsolidimit të paqes sociale.
           
Ai tha se sot, përtej propagandave të stisura, ku ditë pas dite atakohet Islami dhe muslimanët, besimtarët duhet të ndjehen përherë e më shumë krenarë me fenë e tyre islame, që është burim dijeje, qytetërimi, përkushtimi dhe humanizmi në këtë botë.
           
Myftiu iu referua edhe historisë sonë kombëtare, ku theksoi se shqiptarët duhet të ndjehen krenarë, sepse për mbi pesë shekuj kanë qenë drejtues dhe udhëheqës të njërit prej kalifateve më të spikatur të historisë islame, atij osman, ku shqiptarët kishin me dhjetra kryeministra e ministra, dijetarë e shkencëtarë, që i dhanë dritë e mirësi kësaj bote.
           
Për një moment, gjatë hytbes së Myftiut, në sfond nisën të dëgjoheshin këmbanat e Kishës Françeskane. Këtu, Myftiu e ndaloi hytben e tij duke thënë: “Prej vlerave të besimit tonë është edhe respekti ndaj tjetrit, edhe respekti ndaj këtyre këmbanave që bien, për një fé tjetër, që nuk është feja e jonë, mirëpo që i respektojmë dhe, po e ndaloj për pak çaste predikimin në respekt të vëllezërve tanë të krishterë dhe këmbanave të tyre”.
           
Myftiu ka bërë thirrje edhe për afrimin e mëtejshëm të muslimanëve shkodranë me Kur’anin Famëlartë, me leximin dhe kuptimin e tij dhe veshjen me moralin dhe shpirtin e tij të mrekullueshëm.
           
Në përfundim, Myftiu është lutur për të pranishmit, për Shkodrën, për Shqipërinë dhe mbarë ymmetin islam, që Zoti t’i begatojë e t’u dhurojë mëshirë, paqe e begati.
           
Dita e Fitër Bajramit ka shënuar një pjesëmarrje të madhe të besimtarëve të moshave të ndryshme, veçanërisht të rinisë shkodrane.

 

---