Myftinia Shkodër

Të dashur dhe të nderuar, motra dhe vëllezër muslimanë,
Të dashur bashkëqytetarë të Shkodrës,

Edhe pak orë na ndajnë nga iftari i fundit i këtij Muaji të begatë, në të cilin përjetuam mrekulli të shumta të besimit dhe gjendjes së afrimit me Zotin e gjithësisë, nëpërmjet agjërimit me bindje dhe përkushtim, adhurimeve të ditës e të natës, pesë namazeve ditore, 20 rekateve të përnatshme të teravisë, Hatmes Sherife të Kur’anit Famëlartë, sadekave dhe zekatit, sofrave kuptimplota të iftarit me shtresat e ndryshme të shoqërisë, lutjet dhe përgjërimet e Natës së Kadrit etj.
           
Kushdo që ka shpresuar në faljen dhe mëshirën e Tij, e ka pasur mundësinë ta gjejë atë dhe ta fitojë, në këtë periudhë njëmujore, të mbushur me begati hyjnore për shpirtin dhe jetën e secilit prej nesh!
           
Ky Fitër Bajram, si një festë madhore e mbarë ymmetit islam, i gjen muslimanët e mbarë botës në krahët e sprovave të mëdha jetike, fetare, politike, identitare, kulturore, ekonomike, komunitare e përtej tyre.
           
Ky Fitër Bajram, me mesazhet e mrekullueshme të fituara gjatë Muajit Ramazan, është një ftesë hyjnore dhe një tërheqje vëmendjeje për të shikuar më me përparësi në thelbin e fesë islame në shoqëritë tona.
           
Është një ftesë, që çdo musliman të meditojë në mirësitë e fesë së tij dhe të bëjë disa krahasime me propagandën thuajse të përditshme, që bën rolin e zhurmuesit, për ta prezantuar fenë e tij si koka e të keqes globale!?
           
A është vallë Islami ynë nxitës i shkatërrimit, dhunës, shkeljes flagrante të drejtave elementare të njeriut, frikësues i popujve dhe terrorizues i tyre, siç, një grup i caktuar njerëzish me maskë mashtruese, mundohet ta prezantojë sot Islamin, në rolin e misionarit të suksesshëm të mashtrimit dhe terrorizimit të krejt globit?!
           
A mund të jetë dhuna, terrori, frika, kërcënimi, përbaltosja e vlerave të tjetrit, vrasja me gjakftohtësi, dhunimi i objekteve të kultit joislam dhe tmerrimi i jomuslimanëve, identitet i pasuesve të Kur’anit, që nxit: “Njerëzve t’u flisni mirë”, “Dhe veproni të mirën”, “Hyni të gjithë në hapësirat e paqes”, “Mos polemizoni me pasuesit e Librit, vetëm se me atë që është më e mira” etj?
           
A mund të jetë kërcënimi i tjetrit me jetë, vrasja e të pafajshëmve, dhunimi i grave, fëmijëve, gjurmëve të dijes e të kulturës, identitet i atyre, që pasojnë Hz. Muhammedin (a.s), që thoshte: “Unë jam njeriu më i afërt me Isain, birin e Merjemit”, “Musliman është ai, prej dorës dhe gjuhës së të cilit, muslimanët janë të shpëtuar”, “Krejt krijesat janë robë të All-llahut. Më i dashuri i tyre për All-llahun është më i dobishmi i tyre për robët e Tij”. U ngrit në këmbë përpara xhenazes së një të vdekuri dhe, kur i thanë se ishte hebre, u përgjigj: “A nuk është njeri?!”

“Shkoni se jeni të falur”, - u tha mekasve jomuslimanë, që e lënduan pa masë, ditën e çlirimit të saj.

“Unë shpresoj që nga mesi i tyre të dalin besimtarë…”, - ishte përgjigjja e tij, atë ditë kur i lënduar dhe i gjakosur nga femohuesit e qytetit Taif, i përgjigjej melekëve që kishin ardhur ta shkatërronin atë popull!
 
Fitër Bajrami i këtij viti, në këto kontekste historike globale, merr një dimension edhe më të rëndësishëm, teksa bëhet një thirrës i sinqertë drejt vlerave të vërteta islame; afrimin e muslimanëve me njëri-tjetrin mbi baza dijeje, harmonie, vëllazërimi ndërtues, bashkëpunimi në të mirë të komunitetit dhe të vetë shoqërisë.

Është folur këto ditë për frikën e radikalizmit islam në botë. Shumëkush me naivitet a jo, ka rënë pre e këtij mashtrimi global, në emër të Islamit. Shumëkush është ngritur për të zhvilluar konferenca, takime, seminare. Shumë mirë kanë bërë. Edhe më shumë konferenca të tilla të zhvillojnë, sepse nëpërmjet arsyetimit dituror, argumenteve burimore dhe leximeve bashkëkohore, do të vërtetohet se një fé, që në thelb të emrit të saj ka paqen dhe ndërtimin e urave të komunikimit të shëndoshë njerëzor, dialogun dhe pranimin e tjetrit, nuk mund të jetë burim terrori, dhune dhe shkatërrimi.

Diellit nuk mund t’i thuash burim vetimash dhe gjëmimesh, se ca re të zeza kalimtare i kanë zënë dritën dhe madhështinë e tij dhe hiqen si rrezatim lartësishë.
Kështu po ndodh edhe me Islamin, sot në mbarë botën!
 
Fitër Bajrami është ditë gëzimi, ditë adhurimi, ditë faljeje, ditë vizitash dhe takimesh, në të cilat, kemi përherë mundësinë e madhe për t’u dëshmuar muslimanë krenarë me fenë tonë; njerëz të pastër e ndërtues, larg injorancës dhe përherë e më shumë më afër të gjithë atyre që e duan paqen dhe vërshojnë drejt saj, qoftë edhe në drejtime, që shpesh na ndajnë në këtë rrugëtim të gjatë njerëzor.
 
Me zemër të mirë Fitër Bajramin!
Zoti ju bekoftë e ju dashtë!

Imam Muhamed Sytari,
Myfti i Zonës Shkodër
 
 
Shkodër, më 16 korrik 2015 / 29 Ramazan 1436

 

---