Myftinia Shkodër

Pasditën e së mërkurës, më 15 korrik 2015, Myftinia Shkodër në bashkëpunim me AIITC (Aiitc - Instituti Shqiptar i Mendimit dhe Qytetërimit Islam), organizuan një aktivitet shkencoro-kulturor në xhaminë e "Dy Vajzave".

Me rastin e kësaj dite të begatë të Ramazanit, AIITC kishte sjellë ekspozitën e mrekullive të Kur'anit, që tërhoqi vëmendjen e vizitorëve të interesuar për të mësuar më shumë rreth kësaj teme.

Në emër të AIITC, fjalën e rastit e mbajti z. Alban Kodra, i cili theksoi se kjo ekspozitë ka një vlerë të madhe, pasi pasqyron mrekullitë shkencore të Kur'anit, në një format shumë të lehtë e të përshtatshëm për t'u lexuar e vizituar nga të interesuarit.

Ndërkohë, imami i xhamisë së "Dy Vajzave", teologu Lavdrim Hamja, falënderoi bashkëpunimin e Myftinisë Shkodër me AIITC, duke theksuar se aktiviteti i sotëm vjen si një kurorë e bukur, në fund të këtij muaji të mbushur me aktivitete të larmishme.

Aktiviteti u përshëndet edhe nga Myftiu i Zonës Shkodër, Imam Muhamed Sytari, i cili pasi falënderoi kontributin e AIITC në mbledhjen dhe përgatitjen e kësaj ekspozite të vlefshme, tha se prej kohësh shkencëtarët perëndimorë po udhëzohen në Islam nëpërmjet studimit të këtyre mrekullive kur'anore. Ai përmendi dijetarin Krisi Morrison, i cili në një prej librave të tij të titulluar: "All-llahu shfaqet në kohën e shkencës", flet pikërisht për fenomenin e udhëzimit në Islam të dijetarëve të shumtë, specialistë të fushave të ndryshme të shkencës.

Pas faljes së namazit të akshamit me xhemat, për të pranishmit u shtrua një iftar i mbështetur nga AIITC, si dhe u shpërndanë disa libra botime të Institutit Shqiptar të Mendimit dhe Qytetërimit Islam.

 

---