Myftinia Shkodër

Ditën e dielë, më 21 qershor 2015, Myftiu i Shkodrës, Imam Muhamed Sytari, priti në një takim të përzemërt, konsullin e Ambasadës së Kuvajtit në vendin tonë, z. Fejsal Al-Bakr, në një vizitë me rastin e Muajit Ramazan.

Gjatë këtij takimi, Myftiu i Shkodrës, shprehu vlerësimet e tij për kontributet e shumta që Shteti i Kuvajtit ka dhënë dhe vazhdon të japë në Shqipëri, sidomos në ndihmë të projekteve të dobishme sociale, kulturore dhe atyre shpirtërore.

Njëkohësisht shprehu mirënjohjen e tij për bashkëpunimet e dobishme dhe vëllazërore, në ndihmë të njerëzve në nevojë, në qytetin e Shkodrës.

Nga ana tjetër, z. Al-Bakr, shprehu falënderimet e tij për mikpritjen vëllazërore dhe theksoi se kjo vizitë përkon edhe me fillimin e Muajit Ramazan, ku Shteti i Kuvajtit, nëpërmjet organizmave të tij, gjendet i pranishëm edhe në Shqipëri nëpërmjet projektit të ndihmës për njerëzit në nevojë.

Ai theksoi se ndihmat e sjella me këtë rast, janë një dëshmi e vëllazërisë dhe solidaritetit me njerëzit në nevojë, si një mision bamirës universal, me të cilin është shquar dhe shquhet Shteti i Kuvajtit, udhëheqja dhe populli i tij.

Konsulli i Kuvajtit theksoi se bashkëpunimet me Myftininë e Shkodrës do të vazhdojnë edhe në të ardhmen, si shenjë e vëllazërisë dhe mbështetjes në projekte të dobishme, që i shërbejnë komunitetit dhe vlerave të përbashkëta.

 

---