Myftinia Shkodër

Pasditen e së xhumasë, më 19 qershor 2015, Myftinia Shkodër organizoi promovimin e botimit më të ri të imamit dhe teologut Lavdrim Hamja, me titull: "40 hadithe mbi agjërimin dhe Ramazanin".

Aktiviteti u përshëndet nga Myftiu i Shkodrës, Imam Muhamed Sytari , i cili vlerësoi punën e palodhshme të thirrësit islam Lavdrim Hamja, sidomos në drejtim të përkthimit nga gjuha arabe të materialeve të dobishme për lexuesin dhe besimtarët.

Myftiu theksoi se, përgjegjësia e imamëve, sidomos në ditët e sotme, është shumë e madhe, prandaj duhet punuar pa pushim në drejtim të përhapjes së dritës dhe vlerave të Thirrjes Islame në vendin tonë.

Edhe Myftiu i Malësisë së Madhe, H. Edmir Smajlaj, uroi të pranishmit me rastin e fillimit të muajit Ramazan, sikurse u ndal te vlerësimi i këtij botimi, si një dhuratë e bukur në këtë Ramazan. Myftiu i nderuar theksoi se imamët dhe teologët e rinj, kanë mundësi të shumta për të kontribuar në forcimin e mësimeve të fesë dhe përhapjen e tyre në shumë drejtime. Njëkohësisht falënderoi autorin e këtij punimi për këtë kontribut të vyer.

Në fjalën e tij, teologu Lavdrim Hamja, vuri në dukje shtysat që e kanë nxitur të punojë për të nxjerrë këtë punim, që do t'i shërbejë lexuesve, sidomos në Ramazan, për të kuptuar më mirë vlerën dhe rëndësinë e agjërimit dhe muajit Ramazan.

Ai falënderoi të pranishmit për vlerësimin e kësaj ftese dhe uroi që nga ky botim të ketë dobi.

Pas faljes së akshamit me xhemat, të pranishmit morën pjesë në iftarin e shtruar nga Myftinia Shkodër me këtë rast.

 

---