Mesazhi i Myftiut të Shkodrës
me rastin e Ramazanit 1436/2015

Të dashur vëllezër dhe motra muslimanë,
Të nderuar bashkëqytetarë të mi,


Sonte, krejt ne presim me padurim momentin e shfaqjes së Hanës së re të Muajit Ramazan, që sinjalizon fillimin e begatë të këtij muaji të madh, shenjë mëshire, dashurie dhe begatie, nga Zoti për njeriun, sidomos për besimtarët!
  
Rikthimi i Hanës se re të Ramazanit, do të thotë edhe një mundësi e re për të rivlerësuar besën e besimit dhe dorëzimit me zemër e mendje para duarve të Krijuesit, që pret me mëshirë dhe falje, të gjithë ata që kthehen nga Dera e madhe e dashurisë së Tij.

Sot, mbarë bota po kalon momente të vështira, të mbushura me pasiguri, dhunë, luftë, shkelje flagrante të drejtave të njeriut, skamje, uri, varfëri, islamofobi, devijime nga e vërteta, rrëshqitje drejt shthurjes morale, intelektuale, laicizëm selektiv etj. pa fund.
  
Në tërë këtë zymtësi realitetesh, rikthimi i Hanës së re të Ramazanit, mbetet përherë një shenjë shprese, një mundësi kthese, një hapësirë lutjeje dhe një alternativë shpëtimi nga hijet e së keqes, që është përhapur kudo.

“Kur hyn muaji i Ramazanit, hapen dyert e xhennetit, mbyllen dyert e xhehnemit dhe lidhen shejtanët me zinxhirë”[1], - thoshte i dërguari i All-llahut, Hz. Muhammedi (a.s), si për të na sinjalizuar mundësitë e mëdha që i jepen njeriut në këtë muaj, për të gjetur vetëveten, për të konsoliduar besimin, për ta dëshmuar mirësinë e tij në jetë.
 
Të dashur besimtarë,

Ramazani njihet ndryshe edhe si muaji i Kur’anit. Kthehuni me zemër nga Fjala e Zotit, merreni në duar dhe lexojeni atë. Shfrytëzoni ditën dhe natën, për ta përvetësuar dritën e Kur’anit dhe për t’ia mëkuar atë edhe fëmijëve tanë, që po rriten në realitete pa dritë besimi, pa udhëzim hyjnor, plot thirrje tinzare, që i largojnë nga e vërteta dhe bukuritë e saj!

Ju e shihni dita-ditës se të tjerët nuk ngurrojnë të dëshmojnë shthurjen dhe devijimin, haptas, pa ndrojtje, pa frikë, madje edhe të mbrojtur nga dikush, që ka devijuar njësoj si ata, në mos më keq!
  
Ramazani vjen për t’ju forcuar në ndërgjegjen e besimit tuaj, ai ju fton ta dëshmoni këtë mirësi, të mos hezitoni, të mos keni frikë, të mos ngurroni, të mos ndaleni së ftuari drejt Dritës së Zotit, të mos frenoni zemrën së përqafuari me bekimet e ditëve dhe netëve të këtij muaj mrekullibërës!

Prandaj, më lejoni t’ju përhajroj me zemër në prag të Hanës së re të këtij Muaji të shumëpritur, t’ju uroj agjërim të mbarë dhe lutje të pranuara, ju, familjeve tuaja, Shkodrës tonë, Shqipërisë së shtrenjtë, krejt trevave shqiptare, mbarë ymmetit islam!

Mubarek Ramazanin!

Imam Muhamed Sytari
Myfti i Zonës Shkodër
 
Shkodër, 17 qershor 2015


[1]Ahmedi në “El-Musned”, Bukhariu dhe Muslimi, nga Ebu Hurejra (r.a).

 


Mesazhi i Myftiut të Shkodrës me rastin e Ramazanit 1436/2015