Myftinia Shkodër

Ceremonia e sotme, me rastin e inaugurimit të përfundimit të punimeve për faltoren e xhamisë së re në Mes-Myselim, është një gëzim i madh për mua dhe për për mbarë muslimanët e Postribës e Shkodrës. Ky gëzim legjitim, lidhet edhe me finalizimin e ecejakeve të shumta që shoqëruan të gjitha proceset nëpër të cilat kaloi kjo xhami, nga momenti i djegies së xhamisë së vjetër, (pesë vite më parë), deri në këtë ditë dëshmie.
 
Pasurimi i hartës së xhamive të Shkodrës, që sot (falë Zotit) ka 57 të tilla, me këtë kala të re të besimit dhe edukimit islam, në këtë atmosferë të begatë të 25 vjetorit të rilejimit me ligj të fesë në Shkodër e Shqipëri, është padyshim shenjë e bekimeve të All-llahut të Madhëruar për besimtarët e përkushtuar të kësaj zone, që me shumë dëshirë e kanë pritur këtë ditë të lumtur.
 
Në fakt, xhamia e Mes-Myselimit, është sprova e parë e Myftinisë sime!
Pak ditë pasi kisha marrë në dorëzim detyrën e re, më lajmërojnë se xhamia e Mes-Myselimit ishte djegur. E kujtoj si tani atë moment. Sapo ishte falur namazi i sabahut. Dola menjëherë dhe, së bashku me imamin e nderuar, z. Ilir Dizdari, erdhëm në këtë vend, ku sot na mbledh një gëzim i papërshkruar. Tymnaja, që shihej nga larg, sa s’ma nxori zemrën vendit atë ditë…
 
Kur mbërritëm në vendin e xhamisë, imami i asaj kohe dhe besimtarë të shumtë, nuk e fshihnin dot dhembjen dhe befasinë nga ngjarja e papritur. Kishte pllakuar heshtja, që shoqërohej me shenjat e një dhembjeje të madhe… Nuk do t’i harroj lotët e të nderuarit, H. Nuh Ura… Ai, mezi e mbante veten nga tmerri i pamjes së xhamisë, a asaj që kishte mbetur prej saj, që tashmë ishte kthyer në një kujtim, që përzihej me shtëllungat e tymit, teksa dilte si duf i pakontrolluar i një zjarri të pabesë...
 
Nuk do të harroj as gatishmërinë e imamëve tanë të nderuar, që nuk ngurruan të bëhen një dorë e një zemër, ata dhe xhematet e tyre bamirës. Nuk u kursyen për t’iu përgjigjur kërkesës sonë për të dhënë nga pasuria e tyre (secili brenda mundësisë së tij), me qëllim ringritjen e xhamisë së re… Të gjithë dhanë, askush nuk u kursye! Jo pak mbështetje gjetëm edhe ndër miq e vëllezër, si: Bashkësia Islame e Kosovës, Myftinia e Gostivarit, si dhe vëllezër të shumtë nga vende të ndryshme të botës, emigrantët e Postribës, banorët bujarë të Mes-Myselimit etj. Të gjithëve u them: Jua shpërbleftë All-llahu mirësinë dhe bujarinë tuaj, në këtë botë, para të përtejmes!
 
Jam plotësisht i bindur, se kjo xhami, “Xhamia e Hajrateve”, do të dëshmojë me hijeshinë dhe madhështinë e saj, shpirtin e madh dhe fisnikërinë e besimit të krejt atyre që dhanë, a kontribuan në një formë a një tjetër, për realizimin e kësaj mrekullie të munguar në Postribën e Islamit!
 
Me shumë respekt dhe nderim, dua të falënderoj të gjithë banorët e Mes-Myselimit, pa përjashtim, ata të mbarë Postribës bamirëse, xhematet e të gjitha xhamive të Shkodrës dhe krejt imamët tanë të nderuar, që me ndjenjën më të lartë të përgjegjësisë, bënë që Myftinia Shkodër të ndjehet krenare sot për këtë vepër, që të ngroh e të mbush me mirësi, sapo shkel pragun e saj!
 
Në veçanti, dua të përshëndes përkushtimin dhe shërbimet e një personi, që asnjëherë nuk u ndal së punuari dhe lobuari, me krejt forcat e tij, për të mirën e kësaj xhamie dhe xhematit të saj; teologut Altin Nikshiqi, që për shumë vite ishte imam, vaiz, mësues, hatib e çdo gjë në këtë xhami. Ai personifikohej me xhaminë e Mes-Myselimit e, xhamia e këtij fshati besimtar, me emrin e tij! Ai ishte personi, që punoi në heshtje, dhuroi në heshtje dhe duroi në heshtje për këtë xhami dhe rininë e saj veçmas! All-llahu i dhashtë të mbarën në shërbimet e tij, kudo qoftë e kudo shërbeftë në rrugën e Thirrjes Islame!
 
Në fund, jam i lumtur që emri i xhamisë së re në Mes-Myselim, do të mbesë përherë i lidhur me 25 vjetorin e rihapjes së xhamisë së parë, pas viteve të gjata të errësirës… Si të thuash, do të ngelet gjurmë drite e shenjë udhëzimi, që merr e jep me simbolikën e rihapjes së xhamisë së Plumbit, në këtë vit jubilar…
 
Me zemër të mirë xhaminë e re! Gëzuar, me shpirt!

Imam Muhamed B. Sytari
Myfti i Zonës Shkodër
 
(Fjala e rastit në inaugurimin e xhamisë së re në Mes-Myselim)
 Shkodër, më 4 nëntor 2015.

 

---