Myftinia Shkodër

Mbrëmjen e së enjtes, më 22 tetor 2015, Këshilli i Myftinisë Shkodër, zhvilloi një takim këshillimor, ku u diskutua në mënyrë të detajuar programi i ngjeshur i aktiviteteve të muajit nëntor, në prag të datës historike të 25 vjetorit të rihapjes së xhamisë së parë, pas 23 vitesh persekutimi fetar në vendin tonë.

Myftiu i Shkodrës, Imam Muhamed B. Sytari, shpjegoi rëndësinë që ka data 16 nëntor 2015, si një moment reflektimi mbi madhështinë e besimit dhe nevojën e vazhdueshme për të dhënë në rrugën e tij.

Ai tha se këtë vit, Myftinia Shkodër ka zhvilluar aktivitete të shumta, në kuadër të vitit jubilar të 25 vjetorit të rihapjes së xhamisë së parë në Shqipëri, xhamisë së Plumbit. Por, ai theksoi se vlera kryesore e këtij angazhimi maksimal të krejt faktorëve të kësaj mbarësie hyjnore, përqendrohet tashmë në aktivitetet e larmishme të muajit nëntor 2015.

Këshilli i Myftinisë Shkodër, diskutoi për mbi dy orë, krejt programin e prezantuar nga Myftiu, duke dhënë mendime të dobishme, ide për arritjen e më të mirës në drejtim të përkujtimit sa më dinjitoz të kësaj ngjarjeje historike.

Programi i plotë i takimit të kësaj mbrëmje do të bëhet publik shumë shpejt, në një konferencë për shtyp.Me këtë rast, Myftinia Shkodër fton krejt besimtarët dhe qytetarët e Shkodrës, të bëhen pjesë e aktiviteteve në përkujtim të ngjarjes historike të rihapjes së xhamisë së parë, pas shtypjes dhe persekutimit të dhunshëm ateo-komunist.

 

---