Myftinia Shkodër

Paraditën e së shtunës, më 17 tetor 2015, Myftinia Shkodër organizoi një tryezë përkujtimore, në nderim të haxhilerëve të këtij viti, emocioneve dhe përshpirtjeve të përjetuara prej tyre gjatë këtij udhëtimi të mrekullueshëm.

Aktiviteti nisi me fjalën e teologut Arben Halluni, që theksoi se kjo mirësi e madhe e Zotit ndaj haxhilerëve të Shkodrës, është një ftesë reflektimi për mirësitë e mëdha, me të cilat Ai e ka rrethuar jetën tonë dhe obligimin që kemi ndaj këtyre mirësive.

Takimi u përshëndet edhe nga Myftiu i Shkodrës, Imam Muhamed Sytari, i cili uroi të gjithë haxhilerët e pranishëm për haxh të pranuar dhe përfitime shpirtërore, që do reflektojnë mirësinë dhe bukurinë e Islamit edhe në jetën e përditshme, këtu në Shkodër.
Myftiu uroi që kjo mirësi e madhe, të vazhdojë të rrezatojë përherë e më shumë vlera besimi dhe mirësi udhëzimi në Islam për popullin tonë, Shkodrën në veçanti.

Me shumë emocion u ndoq fjala e znj. Zenepe Dibra, e cila pati mirësinë e Zotit që të kryente haxhin e sivjetshëm. Ajo shprehu falënderimet e saj ndaj Zotit, që ia mundësoi ta kryente haxhin dhe të përjetonte emocione të mëdha, të cilat dëshiroi t’i ndante me të pranishmit dhe përtej tyre.

Znj. Dibra theksoi se gjatë qëndrimit në Mekë dhe Medine, është lutur edhe për Shkodrën dhe Shqipërinë, që Zoti ta mbrojë nga haramet, korrupsioni, e keqja, imoraliteti e shthurja, si dhe ta udhëzojë popullin tonë drejt besimit dhe vlerave të tij.

Ajo falënderoi edhe Myftininë Shkodër për trajnimin dhe përkujdesjen e saj në përcjelljen dhe pritjen e haxhilerëve. Me këtë rast, i dhuroi Myftiut të Shkodrës, një kopje të vëllimit të parë librit të saj enciklopedik, titulluar: “Fjalor enciklopedik i hapësirës shkodrane”.

Aktiviteti vijoi me fjalën e mbajtur nga imami i nderuar, teologu Ruzhdi Plangaj, i cili tha se përjetimet e haxhit janë një eksperiencë e pashembullt dhe një mirësi e madhe, që të bën të mbetesh i lidhur me ato vende të shenjta, edhe pas kthimit në vendlindje.

Në fjalën e tij, ai tha se përkushtimi i haxhilerëve shqiptarë ka qenë i madh , njësoj si lutjet e tyre për vendlindjen dhe shqiptarët kudo janë.

Aktiviteti u përshëndet edhe nga z. Kujtim Dervishi, drejtor i Medresesë “Haxhi Sheh Shamia”, si dhe H. Edmir Smajlaj, Myfti i Malësisë së Madhe, që shprehën vlerësimet e tyre për këto organizime të dobishme dhe vlerësimin ndaj haxhilerëve të Shkodrës dhe Malësisë së Madhe.

Në fund, imami i nderuar, z. Agim Hoxha këndoi një ilahi të bukur kushtuar haxhit dhe haxhilerëve, në nderim të këtij tubimi vlerash.

Për të pranishmit, Myftinia kishte organizuar edhe një ftesë për kafe dhe çaj.

 

---