Myftinia Shkodër

Pasdrekën e së mërkurës, më 14 tetor 2015, Myftinia Shkodër organizoi një aktivitet fetar, në përkujtim të fillimit të vitit të ri hixhri, 1437.

Aktiviteti, që u zhvillua në xhaminë e Medresesë, nisi me fjalën e teologut Arben Halluni, i cili tha se përkujtimi i kësaj ngjarjeje, ka një rëndësi të madhe në jetën e muslimanëve, pasi ajo konsiderohet si një cak shumë i rëndësishëm i zhvillimit të Thirrjes Islame, pas viteve të gjata të persekutimit.

Edhe Myftiu i Shkodrës, Imam Muhamed B. Sytari, në fjalën e rastit, tha se përkujtimi i Hixhretit, është një moment reflektimi në jetën e muslimanëve, për t'u zgjuar nga hutimi dhe për të kuptuar se uniteti dhe forca e tyre në bashkëpunim, po bëhet përherë e më shumë një thirrje që vjen nga shekujt e shkuar dhe realitetet e zymta, plot padrejtësi, persekutim, anashkalim dhe shkelje e të drejtave të muslimanëve në mbarë botën.

Myftiu përmendi vendet islame, të pushtuara nga terrori, dhuna dhe agresioni, si: Siria, Iraku, Palestina etj dhe tha se këto realitete po na imponojnë përherë e më shumë nevojën e madhe të lidhjes dhe afrimit tonë me thelbin e fesë dhe mesazhet e saj.

Myftiu tha, se Hixhreti na mësoi se ku ka Islam, ka paqe, stabilitet, mirëqenie, harmoni, respektim i të drejtave njerëzore, humanizëm, pastërti e lidhje të sinqertë me Zotin, që garanton krejt mirëqenien në shoqëri.

Aktiviteti vazhdoi me ligjëratat e teologëve, Ervil Kuçi dhe Adil Cukali, të cilët hodhën dritë mbi mësimet që duhen fituar nga leximi i ngjarjes së Hixhretit, duke theksuar se koncepti i tij është më i gjerë se një emigrim material nga një vend në një tjetër, si ai i Hz. Muhammedit (a.s) dhe sahabëve, nga Meka në Medine.

Në fund, drejtori i Medresesë "Haxhi Sheh Shamia", z. Kujtim Dervishi, shprehu kënaqësinë e tij për zhvillimin e këtij aktiviteti në xhaminë e medresesë, duke theksuar se nga viti në vit, Medreseja "Haxhi Sheh Shamia", po afirmohet me rezultatet dhe arritjet e saj të larta, me kushtet dhe stafin e përzgjedhur.

Në përfundim, të pranishmit u përshëndetën me njëri-tjetrin, duke uruar një vit të mbarë hixhri për Shkodrën, Shqipërinë dhe mbarë ymetin islam.

 

---