Myftinia Shkodër

Me ftesë të Qendrës Islame Shqiptare të Lozanës (Zvicër) dhe kryetarit të saj, z. Fehim Abazi, Myftiu i Shkodrës, Imam Muhamed B. Sytari, mori pjesë në aktivitetet e zhvilluara nga kjo qendër islame, në datat 9-10 tetor 2015.

Ditën e xhuma, më 9 tetor 2015, Myftiu i Shkodrës, mbajti dersin e para xhumasë dhe hytben e saj, ku dha këshillat e tij rreth angazhimit të vazhdueshëm të muslimanëve për ta jetuar fenë e tyre me dinjitet dhe krenari legjitime, sidomos në Zvicër, ku liria fetare respektohet dhe muslimanët shqiptarë e kanë mundësinë më të mirë për ta dëshmuar fenë e tyre, për t'u bërë secili thirrës i urtë dhe i pjekur drejt vlerave islame.

Myftiu mori pjesë edhe në tribunën familjare, që u organizua të shtunën, më 10 tetor 2015, ku mbajti një ligjëratë, duke u përqendruar te domosdoshmëria e ruajtjes së besimit dhe qëndrueshmëri në rrugën e të parëve.

Myftiu tërhoqi vëmendjen e të pranishëmve të shumtë në këtë tubim, drejt rëndësisë që ka ruajtja e fesë islame dhe e gjuhës shqipe, edhe për brezin e ri shqiptar në Zvicër, që falë Zotit, po edukohet më së miri me ruajtjen e identitetit fetar dhe atij kombëtar, duke e dëshmuar këtë gjë me shembuj të mrekullueshëm, që duhen vlerësuar.

Ai vlerësoi kontributin e madh të shqiptarëve në Zvicër për të ndërtuar xhami të reja, të cilat sa vijnë e shtohen, duke dëshmuar njëkohësisht se ato janë vatrat më të mira dhe më serioze, ku shqiptarët gjejnë veten, gjurmët e pastra shekullore, traditat, gjuhën, kulturat dhe bashkëpunimin në mes vete.

 

---