Myftinia Shkodër

Në kuadër të aktiviteteve të larmishme, në prag të përkujtimit të 25 vjetorit të rihapjes së xhamisë së parë, pas persekutimit komunist, pasditën e së mërkurës, më 7 tetor 2015, Myftinia Shkodër organizoi një takim promovues të nr. 150 të gazetës "Udha Islame", në të cilin morën pjesë një grup i ngushtë me imamë, intelektualë, drejtues të shoqatave islame etj.

Aktiviteti u përshëndet nga kryeredaktori i parë i kësaj gazete, teologu Arben Halluni, që foli mbi vlerën e madhe që ka gjallërimi dhe lulëzimi i shtypit islam, sidomos në Shkodër. Ai tha se dalja në dritë e numrit të parë të gazetës "Udha Islame", ishte një gëzim i madh për Myftininë Shkodër dhe dashamirët e saj. Njëkohësisht uroi suksese dhe vlerësoi arritjet e deritanishme të saj.

Fjala e tij u pasua nga analiza e kryeredaktorit aktual të gazetës "Udha Islame, teologut Lavdrim Hamja, që hodhi dritë mbi rëndësinë që ka fuqizimi i muslimanëve në informacion. Duke iu referuar thënieve të mendimtarëve të shquar muslimanë të kohës, ai tha se muslimanët e sotëm janë të përgjumur dhe se detyra e tyre është të zgjohen sa më parë, duke kontribuar e poseduar mediat, prej së cilave të përhapet Fjala e duhur, me urtësi e pjekuri, në shërbim të mesazheve hyjnore, që ndërtojnë jetë.

Ndërkohë, teologu Idmir Plaku, foli mbi vlerën e angazhimit të intelektualëve muslimanë dhe teologëve në shërbim të shtypit islam, duke u ndalur te shembulli i gazetës "Udha Islame" dhe ai i Shkodrës.

Imami i nderuar tha se gazeta "Udha Islame", tashmë në vitin e saj të 13-të, vazhdon të përhapë me sukses mesazhe të urta, që burojnë edhe nga dija dhe studimet e thelluara të dijetarëve më elitarë të botës islame, të përkthyer enkas për faqet e kësaj gazete.

Edhe Myftiu i Shkodrës, Imam Muhamed B. Sytari, falënderoi të gjithë ata që kontribuuan për daljen në dritë të kësaj gazete, duke përmendur të gjithë myftilerët e Shkodrës, si drejtues të saj, si dhe kryeredaktorët e saj, për punën e palodhshme dhe angazhimin e lavdëruar.

Myftiu theksoi se gazeta "Udha Islame", ka nevojë që të vazhdojë në rrugën e saj, për të sjellë para lexuesve të saj urtësinë islame dhe dritën e mesazheve, që përhapen kudo ku ajo mbërrin, jo vetëm në Shkodër e Shqipëri, por edhe përtej kufijve.

Aktivitetin e përshëndeti edhe H. Fejzi Zaganjori, si një ndër redaktorët dhe bashkëpunëtorët më të vjetër të kësaj gazete. Ai shprehu gëzimin e tij për mbërritjen e kësaj dite dhe vlerësoi mundin dhe sakrificën e të gjithë atyre që u angazhuan për këtë mirësi.

 

---