Takimi i imamëve në prag të Ramazanit 1436
16 qershor 2015
Paraditën e së
martës, më 16 qershor 2015, u zhvillua
takimi i radhës i imamëve të Shkodrës,
në prag të hyrjes së Muajit Ramazan
1436.
Me këtë rast, Myftiu i Shkodrës, Imam
Muhamed Sytari, uroi imamët për këtë
mirësi të madhe që po i vjen mbarë
botës; muaji Ramazan.
Ai theksoi se detyra e imamëve dhe
prijësve fetarë është një përgjegjësi e
rëndë, sidomos gjatë Ramazanit, ku
angazhimi shumëfishohet.
Myftiu kërkoi nga imamët të jenë
bashkues dhe nxitës të harmonisë në
komunitetet ku shërbejnë.
Në këtë takim u dhanë edhe udhëzimet e
fundit për mbarëvajtjen e aktivitetit
fetar në xhamitë e Shkodrës, falja e
rregullt e 20 rekateve të lehta të
teravisë, respektimi i orareve të
imsakut dhe iftarit, këndimi në kohë i
ezanit etj.
U lajmërua se duke nisur nga dita e parë
e agjërimit dhe në vijim, deri në Natën
e Kadrit, do të nisë edhe leximi i plotë
i Kur'anit Famëlartë në xhaminë e
Parrucës, pas namazit të iqindisë, ditë
pas dite, si një traditë tashmë e
konsoliduar në qytetin e Shkodrës.
U shpërndanë edhe kalendarët,
fletëpalosjet dhe posterat e Ramazanit,
në mënyrë që kushdo që nuk është pajisur
ende me kalendarin e Ramazanit, ta
kërkojë pranë xhamisë së lagjes a
fshatit të tij.
 |
 |
 |
 |
 |
