Myftinia Shkodër

Ditën e dielë, më 14 qershor 2015, Myftiu i Shkodrës, Imam Muhamed Sytari, ka inspektuar punimet intensive, që po bëhen për rehabilitimin dhe lyerjen e plotë të xhamisë në fshatin Bardhaj.

Kjo fushatë bamirësie, e nisur me iniciativën e mirëbërësve muslimanë të këtij fshati, nën kujdesin e imamit të xhamisë, z. Ilir Dizdari dhe këshillit të xhamisë, bëhet në prag të hyrjes së muajit Ramazan.
           
I gjendur në terren për një inspektim dhe falënderim, Myftiu i Shkodrës ka përhajruar imamin dhe këshillin e xhamisë, për këtë iniciativë pozitive, që siç ka thënë: “Është mënyra më e mirë për ta pritur Muajin Ramazan, duke dëshmuar shpirtin e gëzimit dhe haresë, bamirësisë dhe solidaritetit në mes vete dhe përreth xhamisë.”
           
Myftiu ka thënë, se me këtë rast, Myftinia Shkodër do të hapë një fushatë bamirësie për mbledhjen e një fondi të mjaftueshëm për ndërtimin e minaresë së kësaj xhamie të bukur, që dëshmohet për gjallërinë e saj, për aktivitetet e larmishme me fëmijët dhe të rinjtë e fshatit dhe për rritjen e frekuentimit të saj në faljen e namazit dhe agjërimin e Ramazanit.           

Myftinia Shkodër shpreh mirënjohjen e saj për krejt ata që mendojnë dhe kontribuojnë për xhamitë e Shkodrës dhe gjallërimin e tyre dhe uron Ramazan të mbarë për të gjithë!

 

---