Myftinia Shkodër

Ditën e enjte, më 28 maj 2015, Myftiu i Shkodrës, Imam Muhamed Sytari, zhvilloi një takim pune me një grup imamësh të Myftinisë Shkodër.

Myftiu diskutoi mbi zhvillimet e fundit në vend, atmosferën e prag Ramazanit, sikurse dha udhëzime që lidhen me predikimet fetare dhe gjuhën e tyre. 

"Duhet të jemi të vëmendshëm për atë që themi dhe si e themi, sepse kjo është kohë intrigash dhe sprovash, ku e keqja përpiqet me të gjitha mënyrat për të shfrytëzuar hapësira të mundshme, kundër Islamit dhe muslimanëve në këtë vend dhe në mbarë botën. Kjo na obligon të përqendrohemi edhe më shumë tek tematika e forcimit të vëllazërisë islame dhe rritjes së harmonisë në mes vete. Prandaj, ne duhet të bëjmë detyrën tonë dhe të bartim me dinjitet amanetin e Thirrjes Islame, të cilës i jemi kushtuar! Ditë pas dite po dëgjojmë të flitet për terrorizmin, ekstremizmin fetar, e të ngjashme. E kemi për detyrë të distancohemi publikisht ndaj thirrjeve të dhunës, terrorit, ekstremizmit, që fatkeqësisht, dikush i përdor sot edhe në emër të Islamit. Por, Islami është i pastër nga fëlliqësia e injorancës, nga terrorizmi dhe ekstremizmi, nga mosrespektimi i të drejtave të njeriut dhe intoleranca ndërfetare! Ne jemi thirrës islamë dhe detyra e jonë është shumë e rëndësishme, sidomos në mësimin e njerëzve dhe qartësimin e tyre se Islami është fé e dijes, e drejtësisë, e bamirësisë, e lartësimit të njeriut në rangjet më të larta të besimit, larg dhunës, urrejtjes, ekstremizmit!", - tha Myftiu në fjalën e tij.

Ai theksoi se është e domosdoshme të respektohet detyra e imamit në shërbim të komunitetit dhe besimtarëve.

Myftiu tha se ditëve të fundit, fushatat e islamofobisë janë shtuar, por detyra e jonë është të dëshmohemi njerëz të ekuilibruar, thirrës drejt dijes, harmonisë brenda komunitetit tonë dhe përhapës të denjë të vlerave islame në shoqëri.

Në këtë takim, Myftiu lexoi edhe qarkoren e Komunitetit Mysliman të Shqipërisë drejtuar krejt myftinive të vendit, në lidhje me votimet e 21 qershorit dhe qëndrimin ndaj tyre.

Në fund, u disktua edhe rreth kërkesave dhe shqetësimeve të shfaqura nga imamë të ndryshëm, mbi aktivitetin fetar dhe gjallërimin e mëtejshëm të jetës fetare në Shkodër.

 

---