Myftinia Shkodër

Paraditën e së martës, më 15 maj 2015, Myftiu i Shkodrës, Imam Muhamed Sytari, priti në një takim zyrtar Kryetarin e Komitetit Shtetëror për Kultet, z. Ilir Hoxholli me funksionarë të këtij institucioni.
           
Në qendër të bashkëbisedimit ishte aktiviteti i Myftinisë Shkodër dhe përpjekjet për gjallërimin e jetës fetare dhe rritjen e frymës së fetarizmit në shoqëri.
           
Myftiu, theksoi se këto 25 vite të rilejimit me ligj të fesë në Shqipëri, janë një moment reflektimi për të parë atë që ishim, ku jemi dhe si mund të përmirësohen shumë detaje të jetës fetare dhe shoqërore në vendin tonë.

Ai theksoi se Myftinia Shkodër ka qenë e interesuar dhe vazhdon të punojë me këmbëngulje për ruajtjen e ekuilibrave fetarë në vend dhe dhënien e një kontributi sa më të dukshëm në përcjelljen e mesazheve të harmonisë fetare, që janë shtylla kurrizore e harmonisë kombëtare.

Myftiu kërkoi që institucionet e vendit të jenë të kujdesshme në trajtimin e komuniteteve fetare dhe buxhetet që ndajnë për to, duke shprehur pakënaqësinë e tij për mosvlerësimin e festave fetare islame në Shkodër dhe tendencën në rritje të një fryme islamofobie në rrjetet e ndryshme mediatike.

Nga ana e tij, z. Ilir Hoxholli, theksoi se Myftinia Shkodër ka një rol të dukshëm në përhapjen e vlerave të besimit dhe ato të harmonisë në komunitet, sikurse vlerësoi hapat që hidhen në drejtim të bashkëpunimit në mes të komuniteteve fetare, sidomos në përcjelljen e përbashkët të mesazheve të harmonisë, paqes dhe bashkëjetesës në vendin tonë.

Myftiu, njohu drejtuesit e KShK, edhe me disa prej botimeve më të reja të Myftinisë Shkodër, duke theksuar se po punohet për të shtuar numrin e botimeve të dobishme në shërbim të interesave të besimtarëve dhe lexuesve të ndryshëm.

Temë e këtij takimi ishin edhe zhvillimet e reja në botë, terrorizmi dhe dhuna në emër të fesë, ku u ra dakord se terrorizmi nuk ka fé dhe se ata që po vrasin dhe shkatërrojnë sot në botë, janë kriminelë, larg mësimeve të fesë dhe vlerave të qytetërimeve me themel hyjnor.

 

---