Myftinia Shkodër

Paraditën e së martës, më 12 maj 2015, ka mbërritur për një vizitë të shkurtër jozyrtare në Shkodër, Myftiu i Stambollit, prof. dr. Rahmi Yaran, i shoqëruar edhe nga njëri prej zëvendësve të tij dhe dy nga imamët më të shquar të Stambollit.
           
Në mikpritje të tij, Myftiu i Shkodrës, Imam Muhamed Sytari, ka shprehur gëzimin e tij për këtë takim të përzemërt me Myftiun e nderuar të Stambollit, një personalitet i shquar islam në Turqi dhe përtej saj.
           
Gjatë takimit të përzemërt është diskutuar për tema të ndryshme, si dhe është vënë theksi te domosdoshmëria e angazhimit të përbashkët, në rrafsh ymeti, për afrimin e muslimanëve me njëri-tjetrin dhe largimin nga elementët përçarës dhe tendencat e ndarjes në familjen e madhe islame në botë.
           
Me rastin e këtij qëndrimi të shkurtër në Shkodër, Myftiu i Stambollit, i shoqëruar nga Myftiu i Shkodrës, ka zhvilluar një vizitë të shkurtër edhe në Medresenë “Haxhi Sheh Shamia”, me të dy degët e saj, ku është njohur me shkollën dhe angazhimet për përmirësimin e cilësisë së saj, në drejtim të rritjes progresive, duke u dëshmuar si një ndër shkollat më të mira në rangun e Qarkut Shkodër.
           
Gjatë vizitës në Medrese, ku ka dhënë edhe disa këshilla të dobishme për medresistët tanë, Myftiu i Stambollit është pritur nga drejtori, z. Kujtim Dervishi, si dhe nga koordinatorja e Shoqatës “Istanbul”, znj. Elona Sytari.

 

---