Myftinia Shkodër

Paraditën e së dielës, më 10 maj 2015, në xhaminë e fshatit Oblikë, u organizua një tribunë fetare, në kuadër të përkujtimit të misionit hyjnor me të cilin u dërgua Hz. Muhammedi (a.s) dhe në atmosferën e Tre Muajve të Mirë.

Aktiviteti nisi me fjalën e imamit të xhamisë Oblikë, z. Ridvan Luzaku, i cili vlerësoi tubimin e besimtarëve të kësaj xhamie, si shenjë besimi dhe përmallimi për mësimet e Islamit dhe mesazhet e tij.

Më pas, Myftiu i Shkodrës, Imam Muhamed Sytari, foli mbi rëndësinë e përkujtimit të personalitetit të Hz. Muhammedit (a.s), si shtysë besimi, sidomos për brezin e ri, për t'u afruar përherë e më shumë me udhëzimin e tij dhe shembullin e përsosur, me të cilin u dërgua.

Myftiu theksoi se në realitetet e këtyre ditëve, është me shumë rëndësi të dëshmohet besimi dhe përkatësia e tij, si një dëshmi e shenjtë, e paprekshme dhe që nuk pranon asnjë tolerancë ndaj kujtdo, që përpiqet të prekë thelbin e saj me qëllime jo të mira.

Ai përmendi shembullin e Hz. Ibrahimit (a.s), si modeli i qëndrueshmërisë në besimi dhe mospërkuljes, as para vdekjes, në rrugën e shërbimit ndaj fesë së All-llahut dhe udhëzimit të tij.

Aktiviteti pasoi me këndimin e disa ilahive të bukura dhe pjesëve të "Mevludit", nga Hafiz Shukri Kapllan, H. Vehbi Dani dhe H. Sami Muçej dhe z. Nexhmi Guri.

Me këndimin e ezanit të mesditës, të pranishmit kryen edhe faljen e namazit me xhemat dhe këmbyen lutjet dhe urimet me rastin e këtij tubimi vlerash.

 

---