Myftinia Shkodër

Ditën e enjte, më 30 prill 2015, Myftinia e Malësisë së Madhe ka organizuar ceremoninë e inaugurimit të xhamisë më të re në zonën e Shkodrës, atë në fshatin Kullaj (Gruemirë).
           
Ceremonia nisi me këndimin e një pjese kur’anore, pas së cilës teologu Agim Elezi bëri një pasqyrë të historisë së fillimit të punimeve dhe kontribuuesit e kësaj xhamie, që u ndërtua nën mbikëqyrjen e Myftinisë së Malësisë së Madhe.
           
Më pas, në fjalën e tij përshëndetëse, Myftiu i Malësisë së Madhe, H. Edmir Smajlaj, falënderoi të pranishmit për pjesëmarrjen në këtë ditë të gëzueshme, si dhe bëri thirrje që xhamia e re të frekuentohet me po atë zell, me të cilin u ndërtua dhe u plotësua, me mirësitë e Zotit.
           
Myftiu theksoi se xhamia nuk prodhon terrorizëm, as e nxit atë, përkundrazi, ajo është djep i besimit dhe i harmonisë, vendi ku brezat edukohen me moralin e bukur të fesë dhe ndjenjat më të larta të saj.
           
Ceremoninë e përshëndeti edhe Myftiu i Zonës Shkodër, Imam Muhamed Sytari, i cili theksoi se ndërtimi i kësaj xhamie në këtë tokë, është shenjë hyjnore për dashurinë që Zoti ka për këta njerëz dhe tregues i vullnetit të Tij që feja islame të lulëzojë në tokën dhe vendin tonë.
           
I pranishëm në këtë ditë feste ishte edhe thirrësi islam me banim në ShBA, z. Burhan Fili. Në fjalën e tij, ai shprehu gëzimin dhe emocionet për këtë ditë të begatë dhe vuri theksin te madhështia e mesazhit islam. “Çdo gjë në këtë botë e ka një datë skadimi, vetëm Islami nuk ka skadencë”, tha ai, duke tërhequr vëmendjen e të pranishëmve drejt investimit në jetë në shërbim të fesë dhe vlerave të saj.
           
Në shoqërimin e tekbireve u bë edhe prerja e shiritit të inaugurimit dhe u bë falja e parë e namazit të mesditës me xhemat në xhaminë e re.

 

---