Myftinia Shkodër

Paraditën e së enjtes, më 16 prill 2015, nisën punimet për hedhjen e themeleve të xhamisë së re në fshatin Mjedë, bashkia Vau Dejës. Në fjalën e tij të rastit Myftiu i Shkodrës, Imam Muhamed Sytari, falënderoi Zotin e Madhëruar që mundësoi realizimin e kushteve për nisjen e punimeve për xhaminë e re në fshatin Mjedë. Ai përmendi me shumë respekt shembullin bamirës të plakut të mirë, rahmetliut z. Ragip Rrema (Hasmegaj), që dhuroi tokën për ndërtimin e xhamisë, për të cilin kërkoi që të lexohet një “Fatiha”, në shenjë nderimi.

Njëkohësisht, Myftiu vlerësoi bashkëpunimin e Myftinisë Shkodër me Fondacionin “Mirësia”, në drejtim të realizimit të këtij projekti të bukur e të munguar në fshatin Mjedë, sikurse uroi mbarësi dhe suksese për grupin e punës, që do të nisë punimet në mënyrë intensive.

Në fjalën e tij, Myftiu kërkoi që besimtarët të dëshmojnë besimin e tyre dhe të mos ndikohen nga propaganda e kohës në dëm të Islamit dhe vlerave të tij universale. Nga ana e tij, drejtori i Fondacionit “Mirësia”, z. Korab Kaja, falënderoi të pranishmit për pjesëmarrjen dhe përmendi se fondi për realizimin e këtij projekti është dhuruar nga një zonjë e moshuar besimtare nga Kuvajti, që dëshironte ndërtimin e një xhamie në Shqipëri.
Ceremonia u përshëndet edhe nga imami i Mjedës, z. Asllan Babaj, si dhe u bë duaja e rastit nga H. Fejzi Zaganjori, imam i xhamisë Rus.

Në shoqërinë e tekbireve nga të pranishmit, Myftiu hodhi gurin e parë të themelit, shoqëruar edhe nga familjarët e dhuruesit të tokës, drejtori i Fondacionit “Mirësia” dhe imamët e pranishëm.

 

---