Myftinia Shkodër

Ditën e hënë, Myftiu i Shkodrës, Imam Muhamed Sytari, ka zhvilluar një vizitë pune në Agjencinë Turke për Bashkëpunim dhe Koordinim (TIKA), në Tiranë, ku është pritur nga koordinatori i TIKA-s në vendin tonë, prof. dr. Birol Çetin.
           
Gjatë takimit të përzemërt, Myftiu ka përgëzuar përfaqësuesin e TIKA-s në vendin tonë, për projektet e dobishme, që ky institucion ka marrë përsipër, në rrugën e ringjalljes dhe meremetimit të gjurmëve të vjetra osmane dhe islame në Shqipëri dhe zbatimin e projekteve sociale në shërbim të qytetarëve.
           
Gjatë këtij takimi, prof. dr. Birol Çeti, ka konfirmuar vullnetin e institucionit që përfaqëson për të shtuar bashkëpunimin me Myftininë e Shkodrës, sidomos në drejtim të projekteve të dobishme, që lidhen me trashëgiminë islame në qytetin e vjetër të minareve dhe gjurmëve islame.
           
U diskutua edhe për rastin e xhamisë së Plumbit dhe gjurmëve të disa xhamive të vjetra, monument kulture, për të cilat nuk ka pasur asnjë interesim nga institucionet përkatëse. Myftiu diskutoi edhe për rastin e xhamisë së Sulltan Mehmet Fatihut në kalanë e Shkodrës, duke e konsideruar atë si një gjurmë të vjetër, me një rëndësi të veçantë për komunitetin e muslimanëve të Shkodrës dhe vetë Komunitetin Mysliman të Shqipërisë.
           
Prof. dr. Birol Çetin e ka vënë në dijeni Myftiun se TIKA ka marrë përsipër të ndërhyjë edhe për plotësimin e xhamisë së bukur të fshatit Trush, e cila pritet të inaugurohet në rastin më të parë, pas përfundimit të ndërhyrjeve të fundit që po bëhen në të.           

Myftiu e ftoi koordinatorin e TIKA-s për një vizitë të shpejtë në qytetin e Shkodrës, për të parë së bashku nga afër disa nga vendet e diskutuara në këtë takim të dobishëm.

 

---