Myftinia Shkodër

Paraditën e së mërkurës, më 4 mars 2015, Myftiu i Shkodrës, Imam Muhamed Sytari, priti në një takim të përzemërt e vëllazëror, Drejtorin e Fondacionit “Mirësia”, z. Korab Kaja.

Gjatë takimit, Myftiu ka falënderuar angazhimin dhe kontributin e vyer të Fondacionit “Mirësia” në drejtim të ndërtimit dhe rindërtimit të xhamive të reja në qytete të ndryshme të vendit, sidomos në Shkodër, duke mundësuar një infrastrukturë bashkëkohore për kryerjen e adhurimeve për besimtarët muslimanë.
           
Ndërkohë, z. Korab Kaja, ka konfirmuar edhe një herë vullnetin e mirë të Fondacionit që drejton, në vazhdim të bashkëpunimit të frytshëm me Myftininë Shkodër, me qëllim ndërtimin e xhamive të reja, sipas kërkesave konkrete.
           
Pas takimit, është zhvilluar edhe një inspektim në terren, për të parë nga afër xhaminë e re që po ndërtohet në lagjen Dudas, punimet e së cilës kanë mbërritur në fazën përfundimtare të tyre.
           
Vlen të theksohet se xhamia e re në lagjen Dudas, po ndërtohet në tokën e vjetër vakëf, thuajse në të njëjtin vend ku ka ekzistuar edhe xhamia e mëparshme, e prishur në periudhën e errët të sistemit komunist.
           
Xhamia e re në lagjen Dudas, do të plotësojë më së miri nevojat e besimtarëve të kësaj lagjeje të vjetër muslimane, për kryerjen e adhurimeve dhe mësimin e fëmijëve me rregullat dhe moralin e fesë islame.

 

---