Myftinia Shkodër

Ditën e martë, më 27 janar 2015, Kryetari i Komunitetit Mysliman të Shqipërisë, z. Skender Bruçaj, i shoqëruar nga kancelari i KMSh, z. Ylli Cikalleshi dhe nga myftilerët e nderuar: Ylli Gurra (Myfti i Tiranës dhe Kryetar i KP) Agim Duka (Myfti i Elbasanit), Redin Quku (Myfti i Durrësit) dhe Besnik Leçini (Myfti i Kavajës), zhvilluan një takim pune në Myftininë e Shkodrës, ku u pritën nga Myftiu i Shkodrës dhe stafi i Myftinisë.

Imam Muhamed Sytari, pasi i uroi mirëseardhjen në Shkodër, Kryetarit të KMSh dhe delegacionit shoqërues, bëri një prezantim të aktivitetit të Myftinisë Shkodër, duke theksuar rolin që ka ruajtja e frymës së progresit në prezantimin e mesazheve të pastra të besimit dhe fesë islame në shoqëri.

Vizitorët u njohën edhe me disa nga objektivat e Myftinisë Shkodër për vitin 2015, si vit jubilar i përkujtimit të 25 vjetorit të rihapjes së Xhamisë së Plumbit, më 16 nëntor 1990.

Një rezume të aktivitetit arsimor dhe kulturor në xhamitë e Shkodrës e bëri edhe teologu Arben Halluni, që nëpërmjet statistikave, tregoi për gjendjen e xhamive dhe kurseve fetare, që organizon Myftinia Shkodër në to.

Pas kësaj vizite, Kryetari i KMSh, së bashku me myftilerët e nderuar, falën namazin e mesditës në xhaminë e re te "Dy Vajzave", ku zhvilluan edhe një vizitë në ambientet e saj, të shoqëruer nga imami i kësaj xhamie, teologu Lavdrim Hamja.

Më pas, në një drekë të gjatë pune, u diskutua për një sërë çështjesh, që lidhen me aktivitetitn e secilës Myftini dhe strategjitë për të ardhmen e afërt dhe të largët, në rrugën e prezantimit me dinjitet në sferat e ndryshme të jetës dhe shoqërisë shqiptare.

Ndërkohë, Kryetari i KMSh dhe delegacioni shoqërues, falën namazin e iqindisë në xhaminë e Plumbit, ku imami i saj, H. Mithat Myftija, bëri një prezantim të historikut dhe momenteve më të spikatura të kësaj xhamie ndër vite.

Një vizitë interesante ishte edhe ajo në ambientet e gjurmëve të xhamisë së Qafës, bri xhamisë së Plumbit.

Kjo vizitë pune, vjen në kuadër të një nisme të re takimesh të larmishme në myftini të ndryshme të Shqipërisë, që Kryetari i Komunitetit Mysliman të Shqipërisë, z. Skender Bruçaj, filloi sot në Shkodër.

 

---