Myftinia Shkodër

Paraditen e së shtunës, më 17 janar 2015, në ambjentet e Universitetit “Bedër”, Komuniteti Mysliman i Shqipërisë (Drejtoria e Burimeve Njerëzore), në bashkëpunim me Qendrën e Studimeve Islame të Universitetit “Bedër”, organizuan trajnimin me temë “Islami dhe komunikimi në publik”, me grupin e parë të imamëve të Myftinisë Shkodër.
 
Në këtë trajnim morën pjesë nënkryetari i Komunitetit Mysliman të Shqipërisë, z. Bujar Spahiu, drejtori i Burimeve Njerëzore, z. Dorian Demetja, kryevaizi i Shqipërisë, Lauren Luli, drejtori i Qendrës së Studimeve Islame në Universitetin “Bedër”, z. Atakan Derelioglu etj.
 
Aktiviteti shkencor u çel me këndimin e disa ajeteve kur’anore nga studenti indonezian, Zarfi Rizal.
 
Drejtori i Qendrës së Studimeve Islame, z. Atakan Derelioglu, falënderoi imamët për pjesëmarrjen dhe hodhi dritë mbi vlerën dhe rëndësinë e komunikimit në botën e teknologjisë.
 
Nënkryetari i Komunitetit Mysliman të Shqipërisë z. Bujar Spahiu në fjalën e tij foli për vlerat e thirrjes në Islam dhe dallimet midis kumtimit dhe thirrjes. “Kumtimi është një tërheqje vemëndjeje dhe një rrugë për shpëtim, një përgjegjësi që realizohet me fjalë dhe vepra”- tha z. Bujar Spahiu.
 
Kryevaizi i Shqipërisë, z. Lauren Luli u ndal tek rëndësia e këtyre trajnimeve dhe format e kumtimit. “Profeti (a.s) kumtimit të Islamit i jepte një rëndësi të veçantë. Mendoj se këto seminare do të jenë tepër me vlerë për të përmbushur mangësitë tona, që ta përcjellim sa më qartë mesazhin hyjnor”, u shpreh ai.
 
Ndërkohë, në fjalën e tij, Myftiu i Shkodrës, Imam Muhamed Sytari, tha se thirrja në Islam duhet të karakterizohet nga urtësia dhe mirëpërdorimi i mjeteve të saj, që lidhen edhe me rrethanat. Myftiu theksoi se është me rëndësi të madhe të kuptohet niveli intelektual i njerëzve me të cilët komunikojmë dhe i ftojmë drejt vlerave të fesë tonë. “Imami duhet të ketë elasticitetin e komunikimit, si dhe të njohë mirë rregullat e urtësisë dhe mentalitetin dominues në shoqëri”, tha Myftiu.
 
Arti i të folurit në publik u trajtua nga përgjegjësi i Departamentit të Shkencave të Komunikimit, z. Ramadan Çipuri. Ai foli mbi metodikat e të shprehurit dhe përcjelljes me sukses të mesazhit tek publiku. “Improvizimi i çastit në dhënien e mesazheve fetare nuk është shumë i sygjeruar. I parapregadituri është ai që ndikon më shume dhe e përcjell mesazhin më qartë”, tha ndër të tjera Çipuri.
 
Gjatë trajnimit, përgjegjësi i Departamentit të Shkencave Islame, Dr. Selman Kuzu foli mbi metodikat e thirrjes në Islam. “Shembulli ynë për kumtim fetar është Profeti (a.s). Ato që ne themi duhet t’i nxjerrim nga thellësia e zemrës, dhe në një mënyrë sa më të sinqertë”, tha Kuzu.
 
Edhe Dr. Muhammed Muteveli, pedagog në Universitetin “Bedër”, dha udhëzime mbi metodat e kumtesës dhe karakteristikat e kumtuesit.
 
Para mbylljes së këtij trajnimi, rektori i U. “Bedër”, Dr. Ferdinand Gjana, përshëndeti pjesëmarrësit dhe i informoi ata në lidhje me Universitetin, arritjet dhe objektivat e tij për të ardhmen.
 
Në fund u shpërndanë edhe certifikatat përkatëse të këtij trajnimi plot dobi dhe vlera intelektuale, shkencore dhe teologjike.

Me përshtatje nga: www.kmsh.al

 

---